वर्षाको फिल्ममा पल र पूजाको केमियो

काठमाडौं :  वर्षा सिवाकोटी र पुष्प खड्काको मुख्य भूमिका रहेको फिल्म ‘मनसँग मन’को एउटा गीतमा पल शाह र पूजा शर्माले अभिनय गरेका छन् । बालाजुको चलचित्र विकास कम्पनीको परिसरमा सेट लगाएर चलचित्रमा समावेश ‘मेरो त भाग्य’ बोलको गीतमा वर्षा र पुष्पलाई पल र पूजाले पनि नाच्न साथ दिएका हुन् । 

लकडाउन अगाडि नै छायांकन सुरु गरिएतापनि कोरोनाका कारण फिल्मको सुटिङ रोकिएको थियो । यो गीतमा डेभिड शंकर र भावना राइको स्वर, दिपक शर्माको संगीत तथा विपिन किरणको शब्द छ । यो गीतको भिडियोमा चलचित्रका मुख्य कलाकार पुष्प खड्का, वर्षा सिवाकोटी, वुद्दि तामाङलाई फिचरिङ गरिएको छ । यस्तै, यो गीतमा नायक पल शाह र नायिका पूजा शर्माको साथमा हास्य कलाकार रविन्द्र झा अतिथीको रुपमा देखिदैछन् ।

---

कैलाश राइको निर्देशनमा तयार भएको चलचित्रमा सौरभ लामाको छायांकन, अरुण तामाङको लगानी छ । यो चलचित्रमा अर्जुन जीसीको सम्पादन, सन्तोष खवासको एक्सन छ । नायक पल शाहले एक अर्कालाई सहयोग गर्नुपर्ने समय भएकाले पुष्पको फिल्ममा नृत्य गरेको पलले बताए । भने–‘ लोकलयमा आधारित गीत पनि राम्रो छ । साथमा, यतिबेला हामीले एक अर्कालाई सहयोग गर्ने बेला छ । यसैले पनि मैले काम गरेको हुँ ।

चलचित्रको टिमसँग यसअघि पनि काम गरेकाले जोडिएको हुँ ।’ नायिका पूजा शर्माले पनि चलचित्रलाई केही मात्रामा भएपनि सहयोग पुगोस् भनेर आफू जोडिएको बताइन् । चलचित्रको नाम परिवर्तन भएपनि कथावस्तु परिवर्तन नभएको निर्देशक कैलाश राईले बताए । सुरुमा यो चलचित्रको नाम ‘चालबाज’ राखिएको थियो । अहिले नाम परिवर्तन गरेर ‘मनसँग मन’ राखिएको हो । गीतको कोरियोग्राफी रामजी लामिछानेले गरेका हुन् । 

तस्बिर सौजन्य :  शंकर गिरी