अहिलेसम्मकै महंगो बजेटमा बन्दै ऋतिक र दीपिकाको ‘फाइटर’

मुम्बई :  ऋतिक रोशनको जन्मदिन पारेर सिद्धार्थ आनन्दको निर्देशनमा बन्न लागेको फिल्म ‘फाइटर’को घोषणा गरिएको थियो । फिल्ममा ऋतिकसँगै पहिलो पल्ट दीपिका पादुकोनले अभिनय गर्दैछिन् । दीपिका र ऋतिक जोडी पहिलो पल्ट एकसाथ पर्दामा देखिन लागेको हो ।

यसले यो फिल्मलाई घोषणासँगै विशेष बनाएको छ । तर, यो फिल्म थप विशेष हुन लागेको छ, यो फिल्मको बजेटले । पिंकभिल्लाले लेखेका समाचार अनुसार यो फिल्म २ सय ५० करोडको बजेटमा बन्न लागेको हो । ऋतिकलाई लिएर ‘ब्याङ ब्याङ’ र ‘वार’ जस्तो महंगो फिल्म बनाएका सिद्धार्थले यो फिल्म ‘वार’ भन्दा अगाडि बनाउन चाहेका थिए ।

---

तर, निर्माता यशराज फिल्मले  ‘वार’ बनाउने तयारी गरेपछि सिद्धार्थले पहिले यो फिल्मको काम सकाएका थिए । अहिले भने सिद्धार्थले शाहरुख खान, जोन अब्राहम र दीपिकालाई लिएर ‘पठान’ बनाइरहेका छन् । यो फिल्मको काम सकिएपछि बल्ल ‘फाइटर’को काम सुरु हुनेछ । फिल्ममा ऋतिक रोशन एयरफोर्स पाइलट बन्नेछन् । यही कारण पनि फिल्म महंगो बन्ने प्रक्षेपण छ । फिल्मको सुटिङ भने अर्को वर्षको पनि सेप्टेम्बरबाट मात्र सुरु हुनेछ । यो फिल्मबाट सिद्धार्थ स्वयं पनि निर्माताको रुपमा अघि आउनेछन् ।