बाइडनको शपथमा लेडी गागा र जेनिफर लोपेजले गाउने

वासिङ्टन : जो बाइडनले ५ दिनपछि नयाँ राष्ट्रपतिको शपथ लिँदैछन् । कोरोना महामारीका कारण शपथग्रहण समारोहमा हुने धेरै कार्यक्रम छोट्याइएका छन् वा हटाइएका छन् । तर, शपथ ग्रहण समारोहमा बलिउड सेलिब्रेटीको उपस्थिति भने कम नहुने भएको छ । यस अघि शपथ ग्रहण समारोह टेलिभिजनमा टम ह्याङक्सले सञ्चालन गर्ने खबर आएको थियो ।

योसँगै जस्टिन टिम्बरलेक, डेमी लोभाटो, बोन जोभी आदि कलाकारको पनि प्रस्तुति रहने जनाइएको थियो । तर, शपथग्रहण उद्घाटन समारोह समितिले शुक्रबार समारोहमा जोडिने दुई ठूला सेलिब्रेटीको नाम सार्वजनिक गरेको छ । समारोहमा लेडी गागा र जेनिफर लोपेजको विशेष प्रस्तुति रहने आयोजक कमिटीले जनाएको छ । 
लेडी गागाले चुनावको समयमा राष्ट्रपति निर्वाचित बाइडनका लागि भोट मागेकी थिइन् । उनै लेडी गागालाई बाइडेनले राष्ट्रिय गीत गाउन विश्वास गरेका छन् । जनवरी २० मा हुने कार्यक्रममा लेडी गागाले राष्ट्रिय गीत गाउने आयोजक कमिटीले बताएको छ ।

---

यसैगरी बाइडनको पक्षमा भोट मागेकी जेनिफर लोपेजले पनि समारोहमा बेग्लै प्रस्तुति दिने कार्यक्रम रहेको छ । डोनाल्ड ट्रम्पको शपथ ग्रहण समारोहमा अमेरिकन आइडल विजेताले राष्ट्रिय गीत गाएकी थिइन् भने त्योभन्दा अघि बाराक ओबामाको दोस्रो कार्यकालमा बियोन्सेले राष्ट्रिय गीत गाएकी छिन् ।