हल खुलेसँगै सुटिङमा निस्किए आधा दर्जन फिल्म

काठमाडौं  :  महामारीका कारण सबै तयारी सकेर पनि फ्लोरमा निस्किन नसकेका फिल्म माघ लागेसँगै सुटिङमा निस्किएका छन् । सरकारले हल खोल्ने अनुमति दिएसँगै दोधारमा रहेका निर्माता फिल्म क्षेत्र पहिलेकै लयमा फर्कने अनुमानसहित मैदानमा फर्किएका हुन् । 

यतिबेला आधा दर्जनभन्दा बढी फिल्म फ्लोरमा छन् । यसमध्ये केही फिल्म भने पहिलेको रहल पहल सुटिङ सक्न पनि सुटिङमा निस्किएका छन् । एउटा भरपर्दो हिटको खोजीमा रहेका आर्यन सिग्देल ‘डिसेम्बर फल्स’ लिएर सुटिङमा निस्किएका छन् । उनले गत सोमबार पोखराको विन्ध्यवासिनीमा पूजा गर्दै सुटिङ थालेका हुन् । चलचित्रमा आर्यन सिग्देल, उपासना सिंह ठकुरी, सलोन बस्नेत,शिवहरि पौडेल, दयाराम दाहाल र नरेश भट्टराई लगायतको अभिनय रहने छ । प्रेम कथामाथि आधारित यो चलचित्रलाई प्रविन झाले निर्देशन गर्ने छन भने छायाकार महेश आर गुप्ता हुन । यी दुवै भारतीय चलचित्रमा काम गरिसकेका प्राविधिक हुन । लक्ष्मण रिजाल कार्यकारी निर्माता रहेको फिल्ममा रामप्रसाद रिजाल र राजकुमार भट्ट निर्माता हुन् ।

---

‘हिजो आजका कुरा’ रिलिजको पर्खाइमा रहेकी ऋचा शर्मा यतिबेला ‘कमेडी च्याम्पियन’मा निर्णायकको कुर्सीमा रहेर कमेडियन छानिरहेकी छिन् । यही समयमा ऋचा आफूले निर्माण गरेको फिल्म ‘कौसीद’को सुटिङ गरिरहेकी छिन् । आमाको वर्ष दिनको कामका कारण आफू ब्रेकमा रहे पनि उनले फिल्मको सुटिङ मेलम्चीमा भइरहेको जानकारी गराइन् ।

‘म सोमबारदेखि सुटिङ सेट ज्वाइन गर्छु । मेलम्चीपछि हाम्रो सुटिङ चन्द्रागिरीको लोकेसनमा हुन्छ,’ ऋचाले इकागजसँगको कुराकानीमा भनिन् । ऋचाले यो फिल्मको सुटिङ २० दिनमा सक्ने लक्ष्य राखेकी छिन् । भोला सिलवाल र ऋचाको मुख्य भूमिका रहेको यो फिल्म माघ १ देखि फ्लोरमा गएको हो । 

यतिबेला ‘तिम्रो मेरो साथ’को सुटिङ पनि धमाधम भइरहेको छ । ‘रेड वाइन’बाट नाम परिवर्तन गरेर ‘तिम्रो मेरो साथ’ बनेको यो फिल्मको काठमाडौंका विभिन्न लोकेसनमा सुटिङ भइरहेको छ । कलाकार तथा प्राविधिकलाई निर्माण टिमले होटलमै राखेर स्वास्थ्य सुरक्षा सावधानीसहित सुटिङ गराइरहेको छ । रमेश एमके पौडेलको निर्देशन रहेको फिल्ममा पुष्प खड्का र साम्राज्ञीराज्य लक्ष्मी शाहको मुख्य भूमिका रहेको छ । 

बिहीबारबाट तनहुँमा सुरु भएको फिल्म ‘गणपति’का मुख्य कलाकार मुकुन भुषाल र मेनुका प्रधान ।

आकाश श्रेष्ठ र रेखा शाहको मुख्य भूमिका रहेको ‘हिड्दा हिँड्दै’को पनि काठमाडौंमा धमाधम सुटिङ भइरहेको छ । सलोन बस्नेतसमेत महत्वपूर्ण भूमिकामा अभिनय गरिरहेको यो फिल्म काठमाडौंको सेड्युल सकाएर उदयपुर जाने योजनामा छ । फिल्मलाई मिलन आले मगरले निर्देशन गरिरहेका छन् ।

मुकुन भुषाल र मेनुका प्रधानको मुख्य भूमिका रहेको फिल्म ‘गणपति’को पनि तनहुँमा सुटिङ सुरु भएको छ । मान्छे र भगवानबीचको भिन्नताको कथा प्रस्तुत गर्ने फिल्मको  बिहीबारबाट बन्दीपुरमा सुटिङ सुरु भएको हो । सविन अधिकारीको निर्देशन रहने फिल्मको केही समय अघि औपचारिक घोषणा भएको थियो । 

दसैँअघि नै फ्लोरमा गएर पनि काम नसकिएका फिल्म पनि यतिबेला फ्लोरमा छन् । जस्तो ‘आइ एम ट्वान्टी वान’को सुटिङ दसैँ अघि नै सुरु भएको थियो । तर, दसैँ तिहार र जाडो बारेको फिल्म अन्तिम सेड्युलका लागि फ्लोरमा निस्किएको छ । फिल्मको यतिबेला पाटनमा सुटिङ भइरहेको छ । रेनशा बान्तवा राईको निर्देशन रहेको फिल्ममा धिरज मगर र जसिता गुरुङको अभिनय छ । 

‘आइ एम ट्वान्टी वान’जस्तै ‘परदेशी २’को पनि बाँकी भागको सुटिङ भइरहेको छ । यो नारायण रायमाझीको निर्देशन रहेको फिल्ममा प्रशान्त तामाङ, प्रकाश सपुत केकी अधिकारी र वर्षा सिवाकोटीको अभिनय रहेको छ । फागुनदेखि जेठ अन्तिमसम्मको समय निर्माताले सुटिङका लागि रुचाउने समय हो । यसबेला सुटिङ भएका फिल्म साउनदेखि दसैँतिहारको समयमा रिलिज हुन्छन् ।