ट्रान्सजेन्डर अन्जली लामा हलिउड फिल्ममा

काठमाडौं : भारतमा मोडलिङ गरिरहेकी ट्रान्सजेन्डर अन्जली लामाले हलिउड फिल्ममा अभिनय गर्ने भएकी छिन् । महिलाको विषयवस्तुमा आधारित रही बन्न लागेको फिल्ममा उनले बलिउड अभिनेत्री ज्याकलिन फर्नान्डिजसँगै अभिनय गर्न लागेकी हुन् । 

चारवटा भिन्न कथा जोडेर बन्न लागेको यो फिल्मको नाम ‘सेयरिङ अ राइड’ राखिएको छ । यो कथालाई लीना यादवले निर्देशन गर्न लागेकी हुन् ।  डेडलाइनलले यो फिल्मको बारेमा जानकारी दिँदै फिल्ममा ६ भाग रहने र फिल्ममा विभिन्न देशका महिला निर्देशकको सहभागिता रहने जनाएको छ । फिल्मको सुटिङ इटली, भारत र अमेरिकामा हुनेछ । ड्रामा, कमेडी, डकु ड्रामा र एनिमेसन आदि विधाका यी फिल्ममा सबै कलाकार महिला हुनेछन् । 

---

अन्जली लामा सन् २०१७ देखि भारतमा बसेर मोडलिङ गरिरहेकी छिन् । उनले भारतका प्रतिष्ठित फेसन सो, ‘ल्याक्मे फेसन विक’ सँगै थुप्र्रै फेसन सोमा सहभागिता जनाएकी छिन् भने नेपालका डकुमेन्ट्रीमेकर मोहन राईले उनको जीवन कथालाई समेटेर ‘अन्जली’ शीर्षकको डकुमेन्ट्री बनाएका छन् ।  नुवाकोटमा नविन वाइबाको रुपमा जन्मिएकी अन्जली भारतका सबै फेसन पत्रिकाको कभरमा फिचर्ड भइसकेकी छिन् ।