राजेश हमाल र अनुपविक्रम शाहीसँगै ‘सत्यम’मा जोडिए पल शाह

काठमाडौं  :  कलाकार खोज्न देश दौडाहामा रहेको ‘सत्यम’ निर्माण टिमले देश दौडाहामा निस्किनु अघि नै पल शाहलाई अनुबन्ध गरेको छ । निर्देशक शंकर कार्कीले अडिसनको सूचना सेयर गर्ने क्रममा कलाकारको रुपमा पल शाहको पनि नाम राखेका छन् ।

उनले पोखरा अडिसनको जानकारी सार्वजनिक गर्दै कलाकारको नाममा राजेश हमाल र अनुपविक्रम शाहीसँगै पलको नाम पनि उल्लेख गरेका हुन् ।निर्माण टिमले यस अघि नै राजेश हमाल र अनुपविक्रम शाहीलाई फिल्मका लागि अनुबन्ध गरेको खबर सार्वजनिक गरिसकेको थियो । फिल्मका बाँकी कलाकारका लागि भने निर्माण टिमले काठमाडौंसँगै पोखरा, बुटबल र झापामा अडिसन गर्ने जनाएको थियो । 

---

फिल्मबाट ब्रेक लिएर म्युजिक भिडियो खेलिरहेका राजेश हमालले ४ वर्षको अन्तराल पछि नयाँ फिल्म साइन गरेका हुन् । उनले ३० वटा स्क्रिप्टपछि ‘सत्यम’ मन पराएपछि यो फिल्म गर्न लागेको बताइएको थियो । पल शाह भने पछिल्लो समय म्युजिक भिडियोमा व्यस्त छन् । उनले दिनकै एउटा भिडियो खेल्ने गरेको चर्चा बजारमा छ । निर्माण टिमले पलको जोडीको रुपमा उपासना सिंह ठकुरीसँग कुरा भइरहेको जनाएको छ ।