रण दीलिपको कवितात्मक फिल्म ‘जुनेली’ सार्वजनिक

काठमाडौं :  भ्यालेन्टाइनको मौसम सुरु भएसँगै प्रेमिप्रेमिका लक्षित सिर्जना बजार आउने क्रम जारी छ । म्युजिक भिडियोदेखि सर्ट फिल्मसम्म पनि सार्वजनिक हुन थालेका छन् । यही क्रममा थिएटर भिलेजका कलाकार रण दीलिपले पनि कवितालाई लघु फिल्मको रुपमा प्रस्तुत गर्दै ‘जुनेली’शीर्षकको कवितात्मक फिल्म सार्वजनिक गरेका छन् ।

प्रेमिकालाई जुनसँग तुलना गर्दै लेखिएको कवितामा बियोगान्तक प्रेमकथालाई प्रस्तुत गरिएको छ । कविता पनि दीलिप स्वयंले लेखेका हुन् ।  एउटा प्रेमीको दृष्टिविन्दुबाट प्रेमिकालाई समर्पित गरी लेखिएको उक्त कविताको भिडियोमा रणदीलिप नै कथा वाचकको रूपमा देखिएका छन् । रणदीलिपबाहेक फिल्ममा देशना थापा मगर, साजन कुमार सुनुवार, सौरभी राजभण्डारी, किरण खतिवडा र आयुष बोहराको पनि अभिनय रहेको छ ।  

---

रणदीलिपकै निर्देशनमा बनेको फिल्म ‘जुनेली’को छायांकन विजय ताम्राकारले गरेका हुन् भने सम्पादन रामकृष्ण परियार र विजय ताम्राकारको हो । भिडियो आर्टमाण्डुको च्यानलबाट बाहिर आएको हो । निर्देशक रणदीलिपले लघु फिल्म सत्य घटनामा आधारित रहेको बताएका छन् । भिडियोमा तीन वर्ष अघि काठमाडौंमा भएको युएस बांग्ला विमान दुर्घटना सादृश्य हुने गरी दृश्य रचना गरिएका छन् ।