सौगातका हातैभरि फिल्म, आधा दर्जन बढी रिलिज हुन बाँकी

काठमाडौं  :  शुक्रबारबाट सौगात मल्ल अभिनित नयाँ फिल्म ‘दि सेक्रेट अफ राधा’ फ्लोरमा गएको छ । सुवर्ण थापा निर्देशित यो फिल्ममा सौगात निर्माताको भूमिकामा पनि रहनेछन् । यसअघि सौगात र सुवर्णले ‘रामराम’ शीर्षकको फिल्ममा पनि सहकार्य गर्न लागेको खबर आएको थियो तर यो फिल्म यत्तिकै थन्कियो । ‘रामराम’ छाडेर सौगात र सुवर्ण ‘राधा’ बनाउन लागेका हुन् । 

 ‘कबड्डी कबड्डी’ यता बक्स अफिसमा सौगातका फिल्मले निराशाजनक प्रदर्शन गर्दै आइरहेका छन् । तर, पनि निर्माताले उनमाथिको भरोसा त्यागेका छैनन् । नयाँ फिल्म त भइहाले उनी अभिनित आधा दर्जन फिल्म प्रदर्शनको पालो कुरेर बसेका छन् । 

---

 सौगातले ‘मन्त्र’को सुटिङ सकेको धेरै समय भइसक्यो । ‘बमबहादुर’को रुपमा फ्लोरमा गएको फिल्म पछिल्लो समय ‘मन्त्र’को रुपमा रिलिज हुन लागेको । यो फिल्म टिजर सार्वजनिक भएको लामो समय भइसक्यो तर फिल्म भने कहिले प्रदर्शन हुने टुंगो छैन । 

धेरै पहिले सुटिङ भएर रिलिज हुन नसकेको फिल्ममा ‘घनचक्कर’को पनि नाम आउँछ । यो फिल्मका पनि गीत धेरै पहिले नै सार्वजनिक भइसकेका हुन् तर सुटिङको केही काम बाँकी रहँदा यसले पनि प्रदर्शनको पालो पाएको थिएन । निर्माण टिमले हालसालै बालाजुमा सेट लगाएर फिल्मको बाँकी काम सकाएको जानकारी गराएको छ । 

सौगातले ‘कथा’का निर्देशक प्रसान्त रसाइलीलाई लिएर बीचमा नयाँ फिल्म निर्माण गरेको चर्चा थियो । यो फिल्मको नामदेखि सम्पूर्ण कुरा हालसम्म गोप्य राखिएको छ । तर, कुनै न कुनै दिन यसको पनि सबै कुरा बाहिर आउनेनैछ । सौगातसँगै सृष्टि श्रेष्ठको पनि अभिनय रहेको भनिएको यो फिल्मको पोखरामा सुटिङ भएको चर्चा चलेको थियो ।

प्रदर्शनको पालो कुरेर बस्नेमा अर्पण थापा निर्देशित ‘तीन जन्तु’ पनि छ । अर्पण आफैं खेलेको यो फिल्ममा पनि सौगात र सृष्टिको जोडी देख्न सकिन्छ , लकडाउनको समयमा यो फिल्मको पनि टिजर सार्वजनिक भइसकेको छ । 

सौगातको प्रदर्शन हुन बाँकी रहेको अर्को चलचित्र हो, ‘माइकल अधिकारी’ । गोपीकृष्णको ब्यानरमा बनेको यो फिल्म गत चैतमा प्रदर्शनमा आउने चर्चा थियो । तर, बीचैमा कोरोना भाइरसको महामारीले हल बन्द गराए पछि यो फिल्म पनि पालो कुरेर बसेको छ । 

सौगातको चाँडै प्रदर्शन हुने फिल्म भने ‘लप्पन छप्पन २’ हो । यही सालको चैत २७ गते प्रदर्शन हुने लक्ष्य लिएको फिल्मको केही दिनअघि मात्र टिजर सार्वजनिक भएको छ । 

खेलेर पनि रिलिज हुन बाँकी रहे बाहेक सौगातले खेल्ने सहमति दिएका बाँकी फिल्मको लिस्ट पनि लामै छ । ‘लुट २’ पछि निर्देशनमा फर्कन लागेका निश्चलले दयाहाङ राई र सौगातलाई लिएर ‘जिन्दावाद’ बनाउन लागेको खबरको भर्खरै पुष्टि गरेका छन् भने यो पाला  ‘कबड्डी ४’ पनि दया र सौगातले सँगै अभिनय गर्ने चर्चा छ ।  योबाहेक सौगातले आकाश अधिकारीको निर्देशनमा बन्ने अनाम फिल्म पनि साइन गरिसकेका छन् ।

फिल्ममा शिव श्रेष्ठ पनि महत्वपूर्ण भूमिकामा देखिने समाचार सार्वजनिक भएका थिए । बीचमा सौगातले ‘झ्यानाकुटी २’ पनि गर्ने चर्चा छ । ‘पारस’को निर्देशन गर्न लागेका सिमोस सुनुवारले यो फिल्म पछि ‘झ्यानाकुटी २’ बनाउने चर्चा छ जसमा सौगातले फेरि मुख्य भूमिकालाई निरन्तरता दिनेछन् । 

हल्लाकै कुरा गर्ने भने भने चाहिँ सौगातले रेखा थापाको पनि फिल्म गर्ने हल्ला आएको थियो । तर, त्यो फिल्म पनि बन्ने सुरसार सुनिएको छैन । अहिले रेखा आफैं तौल घटाएर नयाँ फिल्म गर्न तम्तयार छिन् ।