पुरन थापाको ‘तीन जुँगे’मा एक जुँगे अर्पण थापा

काठमाडौं :  निर्देशनमा व्यस्त रहेका अर्पण थापा अभिनयमा पनि उत्तिकै व्यस्त छन् । फिल्मकै सिलसिलामा अष्ट्रेलिया रहेका अर्पणले उताबाट फर्कने बित्तिकै पुरन थापाको निर्देशनमा बन्न लागेको फिल्म ‘तीन जुँगे’साइन गरेका छन् । निर्माण टिमले मंगलबार मात्र उनीसँग कागजी सम्झौता गरेको हो ।

पुरनले केही समयअघि आफ्नो जन्मदिनको अवसर पारेर फिल्मको घोषणा गरेका थिए । यसअघि ‘पिरिम पर्या छन्,’ ‘कान्छी मट्याङ ट्याङ’,‘फेरि–फेरि’ लगायतका कमेडी फिल्म तथा थुप्रै टेलिश्रृंखला निर्माण, निर्देशन गरिसकेका थापाको ‘तीन जुँगे’ को छायांकन फागुनको तेस्रो साताबाट सुरु हुने छ ।

---

अमृत लम्साल र भुवन तिवारी निर्माता रहेको ‘तीन जुँगे’ मा निर्देशक स्वयम् पनि महत्वपूर्ण भूमिकामा देखिनेछन् । त्यसबाहेक फिल्ममा ,लय संग्रौला, दमन रुपाखेती, निक शर्मा, सुमित्रा अधिकारी, रमेश मट्टारे, मनीषा रायमाझी, शिखा सुवेदी,ललित सिंह साउद, विकल उप्रेती, सबिता दनाइ, सुपा खनाल, छायाँ भुजेललगायतका कलाकारले अभिनय गर्दैछन् ।

विमल ढकालले खिच्ने फिल्ममा बिनोदकुमार भुजेलको संगीत, ललित सिंह साउदको सम्पादन, रुपा मानन्धरको मेकअप र शंकर महर्जनको द्धन्द्ध निर्देशन रहने छ ।