अमालको डेब्यु पपमा अदिती बुढाथोकीको मोडलिङ

काठमाडौं : बलिउडमा जम्न संघर्षरत अदिती बुढाथोकीले त्यताका फिल्ममा त चान्स पाएकी छैनन् तर यदाकदा म्युजिक भिडियोमा राम्रै उपस्थिति जनाउने गरेकी छन् । केही समयअघि गायक, कलाकार, निर्देशक फरहान अख्तरसँग ‘इन्साइड एज २’को म्युजिक भिडियोमा देखिएकी अदितीले भर्खरै अमाल मलिकको डेब्यु गीतमा मोडलिङ गरेको जानकारी गराएकी छन् ।

‘तु मेरा नही’बोलको गीतको टिजर सार्वजनिक भएसँगै अदितीले इन्स्टामा अमालसँगको फोटो शेयर गर्दै उनको गीतमा मोडलिङ गरेको जानकारी दिएकी हुन् । उनले अमालसँग फोटो शेयर गर्दै लेखेकी छन्,‘यो गीत मेरा लागि एकदमै स्पेसल छ । यस्तो गीतमा काम गर्ने मौका दिएकोमा अमाललाई धेरै धेरै धन्यवाद । हरकोहीले यो गीतमा आफूलाई पाउनुहुनेछ भन्ने विश्वास छ ।’ उनले अमाललाई प्रतिभाशाली र भलादमी रहेको भन्दै प्रशंसा पनि गरेकी छिन् । 

---

अदितीले मोडलिङ गरेको यो गीत अमालको पप विधामा डेब्यु हो । उनले यसअघि थुप्रै बलिउड फिल्मका लागि संगीत गर्ने र गाउने काम गरेका छन् । अमालले यसअघि ‘कबिर सिंह’, ‘धोनी’ र ‘एयरलिफ्ट’ जस्ता फिल्मका स्वर तथा संगीत दिएका छन् । गीतको भिडियो दुबईमा खिचिएको थियो । नेपालमा रहेकी अदिती एक महिनाअघि मात्र भारत हुँदै दुबई गएकी थिइन् । 

इन्स्टामा १० लाखभन्दा ज्यादा फ्लोअर भएकी पहिलो अभिनेत्री बनेकी अदितीले  ‘कृ’बाट नेपाली फिल्ममा डेब्यु गरेकी थिइन् । पहिलो फिल्मबाट औसत प्रतिक्रिया पाएकी अदितीले गायक नितेशजंग कुँवरको अपोजिटमा दोस्रो फिल्म गर्न लागेकी छिन् । ‘बेन्जो’ नाममा बन्न लागेको यो फिल्मको सुटिङ महामारीका कारण रोकिएको छ । 
गायक तथा संगीतकार अमाल मलिकसँग अदिती ।