‘क्लियोपेट्रा’ बन्दै गल गडोट

विश्व इतिहासमा कामुक महिलाको रुपमा परिचित छिन् क्लियोपेट्रा । भनिन्छ, उनी जति सुन्दर र कामुक थिइन् त्योभन्दा ज्यादा चतुर, षडयन्त्रकारी र क्रुर थिइन् । मिश्रकी महारानीसमेत बनेकी क्लियोपेट्रा राजा महाराजालाई आफ्नो सुन्दरताले लठ्ठयाएर आफ्नो नियन्त्रणमा राख्थिन् । 

इतिहासकारका अनुसार उनले सर्पलाई आफ्नो वक्षस्थल ठुंगाएर आत्महत्या गरेकी थिइन् । रोमका राजा जुलियस सिजरसँग गहिरो प्रेममा रहेको भनिएकी क्लियोपेट्राका यस्तै विविध रहस्य उद्घाटन गर्ने गरी फिल्म बन्‍ने भएको छ । हलिउड अखबार डेडलाइनले छापेको खबर अनुसार ३५ वर्षकी गल गडोटले ‘क्लियोपेट्रा’को रुपमा अभिनय गर्नेछिन् । 

---

फिल्मलाई प्याटी जेन्किन्सले निर्देशन गर्नेछिन् । प्याटी र गलले दोस्रो पटक फिल्मका लागि सहकार्य गर्न लागेका हुन् । गल गडोटलाई ग्लोबल सुपरस्टार बनाउने ‘वन्डर वुमन’ प्याटीले नै निर्देशन गरेकी थिइन् । गलले इन्स्टामा फिल्म खेल्न लागेको खबर पुष्टि गर्दै पहिलो पल्ट इतिहासलाई महिलाको आँखाबाट वाचन गर्न लागिएको बताएकी छिन् । 

‘पर्दा भित्र र बाहिर दुवैबाट महिलाले महिलाको इतिहास वाचन गर्न लागेको यो पहिलो अवसर हो । यसले कथा बोकेर बसेका हरेक महिलालाई आफ्नो सपना पूरा गर्ने प्रेरणा दिन्छ,’ उनले इन्स्टामा लेखेकी छिन् । असअघि सन् १९९६ मा एलिजाबेथ टेलरले पछिल्लो पटक ‘क्लियोपेट्रा’को भूमिका निर्वाह गरेकी थिइन् । फिल्मले ४ वटा अस्कर जितेको थियो । त्यो भन्दा पहिला सन् १९३४ मा पनि उनको जीवनीमा फिल्म बनेको थियो ।