‘कृष्णलीला’को ट्रेलर सार्वजनिक, फिल्ममा पुष्पको फरक चरित्र

काठमाडौं : चैत २७ मा प्रदर्शन हुन लागेको फिल्म ‘‘कृष्णलीला’को ट्रेलर सार्वजनिक भएको छ । पुष्प खड्का र श्रद्धा क्षेत्रीको मुख्य भूमिका रहेको फिल्ममा बुद्धि तामाङ, रविन्द्र झा आदि कलाकारको पनि अभिनय रहेको छ । 

प्रेमकथा शैलीको फिल्ममा पुष्प खड्काले फरक चरित्रमा अभिनय गरेका छन् । फिल्ममा पुष्पलाई सोझो र सुस्त मनस्थिति भएको युवकको रुपमा देख्न सकिन्छ । 
कोरोना भाइरसको महामारीपछि हल खुलेसँगै सार्वजनिक प्रदर्शनमा आउन लागेको नयाँ फिल्म हो । यही मितिमा सौगात मल्ल, अर्पण थापा आदि कलाकारको अभिनय रहेको ‘लप्पन छप्पन २’ पनि प्रदर्शन हुँदैछ । 

---

तीन मिनेट हाराहारीको ट्रेलरमा प्रेमकथासँगै फिल्ममा सस्पेन्सलाई पनि प्राथमिकता दिएको छ । दीपक ओलीको निर्देशनमा बनेको फिल्ममा पुष्प र श्रद्धासँगै बुद्धि तामाङ, रबिन्द्र झा, भावना गुरुङ, नवीन रेग्मी, हिउँवाला गौतम, आयुष गुरागाई लगायतका कलाकारहरूको पनि अभिनय रहेको छ ।

लक्ष्मण सुवेदीको लेखन रहेको फिल्ममा शिव ढकालको छायांकन, अर्जुन जिसीको सम्पादन, अर्जुन पोखरेलको संगीत, रामजी लामिछानेको कोरियोग्राफी र श्री श्रेष्ठको द्वन्द्व निर्देशन छ ।

रोहित कट्टेल प्रस्तुतकर्ता रहेको फिल्ममा रत्न श्रेष्ठ कार्यकारी निर्माता, प्रकाश राज कार्की र केवल तामाङ निर्माता, पिताम्बर आचार्य र रोजन श्रेष्ठ सह–निर्माता छन् । यसअघि नै ‘कृष्णलीला’ को पोस्टरसहित ‘डियर बन्न र ‘कुनै दिन’ बोलका दुई गीत सार्वजनिक भइसकेको छ । योमध्ये ‘कुनै दिन’ टिकटकमा निकै हिट भएको छ ।