२० वर्षपछि फेरि ‘रहना है तेरे दिलमें’,  रिमेकमा विक्की र कृति ?

मुम्बई :  आजभन्दा २० वर्ष पहिला रिलिज भएको ‘रहना है तेरे दिलमें’को रिमेक बन्ने भएको छ । निर्माता वास भगनानीको कम्पनी पूजा इन्टरटेनमेन्टले यसलाई फेरि बनाउने तयारी थालेको हो । 

बासु भगनानीका छोरा ज्याकी भगनानीले रिमेक गर्ने गरी निर्देशक पनि छानिसकेका छन् । ज्याकीले श्रीदेवी अभिनित ‘मम’ निर्देशक रभि उदयवारलाई निर्देशकको जिम्मेवारी दिइएको बलिउड हंगामाले खबर छापेको छ । 

---

गौतम मेननको लेखन तथा निर्देशन रहेको यो फिल्म माधवनको हिन्दी डेब्युसँगै मिस इन्डिया दिया मिर्जाको पनि डेब्यु फिल्म थियो । फिल्ममा सैफअलि खान पनि मुख्य भूमिकामा थिए । उसबेला फिल्मले बक्स अफिसमा औसत व्यापार गरेको थियो तर कालान्तरमा यो क्लासिक मानिएको थियो । 

रिमेकमा ज्याकीले माधवन र दिया मिर्जालाई केमियोका लागि मनाइसकेका छन् । तर नयाँ फिल्ममा मुख्य भूमिकामा को रहने निर्माण टिमले खुलाइसकेको छैन । स्रोतका अनुसार फिल्मका लागि विक्की कौसल र कृति सेननलाई प्रस्ताव गरिएको छ । तर, सैफले गरेको भूमिकाका लागि भने निर्माण टिमले अहिले पनि कलाकार खोजिरहेको छ ।