संगीताको ‘आइसक्रिम’लाई अफ्रिकामा दुई अवार्ड

संगीता श्रेष्ठको लघु चलचित्र ‘आइसक्रिम’ले ‘अफ्रिका फिल्म फोर इम्प्याक्ट फेस्टिभल’ मा मा दुई अवार्ड जितेको छ । निर्देशक  संगीता श्रेष्ठले शनिबार राति घोषणा भएको अवार्ड समारोहमा  फिल्मले उत्कृष्ट अभिनेत्री र सम्पादन गरी दुई विधामा अवार्ड जितेको जानकारी गराइन् । नोभेम्बर तीनदेखि सुरु भएको फेस्टिभलको पहिलो दिन नै फिल्म स्क्रिनिङ भएको थियो ।

 

---

निर्देशक संगीताले फिल्मले अवार्ड जित्ला भन्ने कल्पना पनि नगरेको तर दुई –दुइटा अवार्ड पाउँदा चकित परेको प्रतिक्रिया दिएकी थिइन् । ‘फेस्टिभल भरी मैले पनि संसारभरका फिल्म हेरें । हाम्रो फिल्मको तुलनामा धेरै बजेटमा बनेका र प्राविधिक रुपमा पनि सक्षम फिल्म थिए । तर, पनि आइसक्रिमले अवार्ड जितेको देख्दा खुशी लागेको छ,’संगीताले इकागजसँग प्रतिक्रिया दिँदै भनिन् ।  संगीतले बाल यौन हिंसाको विषय र सम्पादनमा गरेको प्रयोगले नै फिल्मलाई अवार्डको हकदार बनाएको बताइन् ।

‘पहिला बाल यौन हिंसाको विषय फेस्टिभलका जुरीलाई रोचक लागेको हुनसक्छ,’ उनले अवार्ड जित्ने सम्भावित कारणबारे ब्याख्या गर्दै भनिन्, ‘अर्को चाहीँ हामीले प्रस्तुतिमा थोरै प्रयोग गरेका थियौं । सायद यही कारण नै हो जुरीले फिल्म रुचाए ।’ फिल्ममा सडकमा पैसा माग्दै हिड्ने एक बालिकाको कथा समेटिएको छ । नौ मिनेट लामो फिल्ममा योगिशा खत्रीले मुख्य भूमिका निभाएकी छन् । फिल्मको सम्पादन लोकेश बज्राचार्यले गरेका हुन् । संगीताका अनुसार फिल्म २ लाख हाराहारीको बजेटमा तयार भएको हो ।  

 

 श्रेष्ठका अनुसार यो चलचित्र अमेरिकाको ‘बेस्ट अफ ल्याटिन अमेरिका सर्ट फिल्म फेस्टिभल’, युकेको ‘फस्ट टाइम फिल्ममेकर सेसन्स’, इटालीको ‘इन्टिमलेन्ट फिल्म फेस्टिभल’ र नेपालको ‘मानव अधिकार फिल्म फेस्टिभल २०२०’ मा पनि छनोट भइसकेको छ । संगीताले ‘कथा काठमाडौं’ फिचर फिल्मबाहेक थुप्रै म्यजिक भिडियो, वृत्तचित्र तथा लघु चलचित्र निर्देशन गरेकी छन् । कान्तिपुर टेलिभिजनबाट प्रसारण भएको ‘कथा प्रेमका’ पनि संगीताले नै निर्देशन गरेकी हुन् ।