बैंकको स्रोत परिचालन बाग्मती प्रदेशमा धेरै, निक्षेपको ६८.१% र कर्जाको ५६.६%

काठमाडौँ– नेपाल राष्ट्र बैंकको संघीय प्रणालीमा बैंक तथा वित्तीय संस्थाको स्रोत परिचालन सम्बन्धी अध्ययनले वित्तीय स्रोतको सबैभन्दा बढी केन्द्रीकरण बाग्मती प्रदेशमा रहेका देखाएको छ ।

केन्द्रीय बैंकको अध्ययन अनुसार आर्थिक वर्ष २०७७–७८ मा बैंक तथा वित्तीय संस्थाबाट परिचालन भएको कुल निक्षेपको ६८.१ प्रतिशत र कुल कर्जाको ५६.६ प्रतिशत बाग्मती प्रदेशमा रहेको उल्लेख छ । त्यस्तै, बैंक तथा वित्तीय संस्थाको शाखामध्ये सबैभन्दा बढी ३४ प्रतिशत बाग्मती प्रदेशमा र सबैभन्दा कम ४ प्रतिशत कर्णाली प्रदेशमा रहेको देखिएको छ । 

---

कर्णाली प्रदेशमा निक्षेप परिचालन र कर्जा प्रवाह दुवै न्यून रहेको अध्ययनमा उल्लेख छ । अध्ययनमा ‘क’, ‘ख’ र ‘ग’ वर्गका बैंक तथा वित्तीय संस्थाको तुलनामा लघुवित्त वित्तीय संस्थाहरूको वित्तीय पहँुच तथा वित्तीय स्रोत परिचालन प्रदेशगत रूपमा बढी सन्तुलित देखिएको बताइएको छ । 

पछिल्ला वर्षहरूमा बाग्मती प्रदेशको तुलनामा अन्य प्रदेशमा साधन परिचालन क्रमिक रूपमा विस्तार भइरहेको अध्ययनले देखाएको छ । सहुलियतपूर्ण कर्जा र पुनरकर्जाको पहुँच बाग्मतीबाहेकका प्रदेशहरूमा उत्साहजनक रूपमा बढेको उक्त अध्ययनमा देखिएको छ । 

औद्योगिक उत्पादन, कृषि तथा अन्य प्राथमिकताप्राप्त क्षेत्र कर्जाको वितरण क्रमिक रूपमा सन्तुलित हँुदै गएको छ । तथापि, वित्तीय पहुँच न्यून रहेका प्रदेशहरूमा साधन परिचालन अभिवृद्धि गर्न माग पक्षमा सुधार गर्नुपर्ने देखिएको छ ।