चुनावी परिणामबारे नारायणकाजीको विश्लेषण : सबै आँधीबेरी जीवन ध्वंश गर्न नभइ बाटो सफा गर्न पनि आउँछ

काठमाडौँ- नेकपा माओवादी केन्द्रका उपाध्यक्ष नारायणकाजी श्रेष्ठले निर्वाचन परिणामको समग्र विश्लेषण र संश्लेषण गर्नैपर्ने बताएका छन् ।

प्रदेश र प्रतिनिधिसभाको निर्वाचन मतगणना जारी रहेकै बेला बुधबार उनले अहिलेको निर्वाचनले निश्चित सन्देश दिएको बताएका छन् । यसबारे पार्टीमा बहस र छलफल हुनुपर्ने उनको तर्क छ ।

---

निर्वाचनको परिणामबारे अहिलेसम्म माओवादीका ठूला नेता कसैले पनि टिप्पणी गरेका छैनन् । सबैले नतिजा कुरिरहेका छन् । तर, नेता श्रेष्ठले भने बुधबार सामाजिक सञ्जालबाट निर्वाचन परिणामबारे विश्लेषण र संश्लेषण गर्नुपर्ने तर त्यसका लागि घोत्लिन जरुरी नभएको उल्लेख गरेका छन् । उनले सबै आँधीबेरी जीवन ध्वंश गर्न नभई बाटो सफा गर्न पनि आउने बताएका छन् ।

‘निर्वाचन परिणाम आइरहेका छन् । यसले निश्चित सन्देशहरू दिएको छ । यसबारेमा समग्र विश्लेषण, संश्लेषण गर्नै पर्छ । त्यसका लागि धेरै घोत्लिनुपर्ने स्थिति पनि छैन । निष्कर्ष सहज बोधगम्य नै छ' उनले लेखेका छन् 'तर अहिले यति मात्रः  बुद्ध शिक्षाको महत्वपूर्ण निम्न अंशलाई मनन गरौं । सबै आँधिबेरीहरू तपाईको जीवन ध्वंश गर्न मात्र आउँदैनन्, कुनै तपाईंको बाटो सफा गर्न पनि आउँछन् ।’