दसैँमा आउने भयो ‘प्रेमगीत ३’, के भारत रिलिज नहुने भएको हो ?

काठमाडौँ - बारम्बार मिति तोकेर पनि प्रदर्शन हुन नपाएको फिल्म ‘प्रेमगीत ३’ले अन्ततः असोज ७ लाई नयाँ मिति घोषणा गरेको छ । निर्माण टिमले दसैँको मुख पारेर आइतबार फिल्म रिलिजको नयाँ मिति तोकेको हो । योसँगै यो साल दसैँका लागि फिल्मबीच राम्रै प्रतिस्पर्धा हुने भएको छ । 

दसैँको यो मिति छेऊछाऊ ‘परदेशी २’ले प्रदर्शन मिति घोषणा गरिसकेको छ भने दिवाकर भट्टराईको ‘हनी बनी’ले पनि दसैँमा नै आउने घोषणा गरेको छ । योबाहेक ‘छक्का पञ्जा ४’ पनि दसैँमा नै आउने निर्माताले अनौपचारिक घोषणा गरिसकेको छन् । तर यो फिल्मको भन्ने असार १ गतेबाट बल्ल सुटिङ सुरु हुँदैछ । 

---

स्वर्गीय छेतन गुरुङ र सन्तोष सेनको निर्देशन रहेको फिल्ममा प्रदीप खड्का र कृष्टिना गुरुङको मुख्य भूमिका रहेको छ । केही समयअघिसम्म निर्माताले यो फिल्म नेपाल र भारतमा एक साथ रिलिज गर्ने बताएका थिए । तर आइतबार निर्माताले नयाँ पोस्टरसहित नेपाल रिलिज घोषणा गर्दा भारत रिलिजको विषयमा केही बोलेका छैनन् । जबकि यो फिल्म भारतमा पनि रिलिज गर्ने गरी यो फिल्मको हिन्दीमा डबिङसमेत भइसकेको छ ।