सलमानका बाबु-छोरालाई चिठ्ठी पठाएर हत्याको धम्की

मुम्बई -  बलिउड अभिनेता सलमान खान र उनका पिता सलिम खानलाई एक अज्ञात व्यक्तिले पत्र लेख्दै मार्ने धम्की दिएका छन् । यो मामलालाई गम्भीर रुपमा लिँदै मुम्बई प्रहरीले बान्द्रा पुलिस स्टेसनमा उजुरी दर्ता गराएर अनुसन्धान सुरु गरेको छ । समाचारअनुसार यो धम्कीपूर्ण पत्र सलिमलाई प्राप्त भएको थियो ।

यसपछि सलिमले मुम्बईको बान्द्रा प्रहरी चौकीमा उजुरी दिएका थिए । मुम्बई प्रहरीले तुरुन्तै अज्ञात व्यक्तिविरुद्ध मुद्दा दर्ता गराएर अनुसन्धान सुरु गरेको हो । तर पत्रमा ज्यान मार्ने बाहेक अन्य के—के विषयमा धम्की दिइएको छ भन्ने कुरा केही खुल्न सकेको छैन ।

---

यसअघि नयाँदिल्लीको तिहाड जेलमा रहेका ग्याङस्टार लरेन्स बिश्नोईले सलमानलाई मार्ने धम्की दिएका थिए । लरेन्स त्यही व्यक्ति हुन्, जसमाथि पञ्जाबी गायक तथा र्‍यापर सिद्धु मुसेवालाको हत्या गरेको आरोप छ । सिद्धुको हत्यापछि प्रशासनले सलमानको सुरक्षाको संख्या पनि बढाएको थियो ।

सलमानमाथि राजस्थानका जोधपुरमा कालो हरिण शिकारको आरोप छ । कालो हरिणलाई बिश्नोई समाजले निकै पवित्र मान्छन् । त्यहीकारण लरेन्सले सलमानलाई मार्ने धम्की दिएको अनुमान गरिएको छ । यसअघि अगष्ट २०२० मा हरियाणा प्रहरीले राहुल साँगा नामका व्यक्तिलाई पक्राउ गरेको थियो ।

राहुल लरेन्स बिश्नोई ग्याङका सुटर थिए । प्रहरीको अनुसन्धान पछि ती व्यक्तिले आफू लरेन्सको भनाइ अनुसार सन् २०२० मा सलमानको घरको रेकी गर्न आएको खुलासा गरेका थिए ।