अनमोलको अपोजिटमा डेब्यू गर्ने ताकमा नीति शाह

काठमाडौँ - पूर्व मिस इन्टरनेसनल नीति शाह केही वर्षअघिसम्म फिल्मको अफर लिएर जाने निर्माता÷निर्देशकलाई ‘फिल्ममा चाख’ नभएको भन्दै फर्काउँथिन् । तर यो साल भने नीति आफैँ फिल्म खेल्न तम्सिएकी छिन् । उनले फिल्म गर्नका लागि म्यानेजर राखेर यसको सुरुवात गरिसकेकी छिन् भने पटकथा लेखकको पनि खोजी जारी राखेकी छिन् ।

उनले केही दिनअघि सामाजिक सञ्जालमा लेखक चाहियो भन्दै पोस्ट पनि राखेकी थिइन् । यसले नीति आफैँ फिल्म निर्माण गरेर नेपाली फिल्ममा डेब्यू गर्न लागेको संकेत गर्छ । तर यसका लागि उनले हिरो को लेलिन् ? चासोको विषय छ । तर नीति निकट स्रोतका अनुसार पहिलो फिल्म गर्दा उनी चलेकै हिरोसँग काम गर्ने तयारीमा छिन् । यसका लागि उनको नजर अनमोल केसी र प्रदीप खड्कामा छ ।

---

नीति तुलनात्मक रुपमा अनमोलभन्दा प्रदीपसँग निकट छिन् । प्रदीपसँग उनले डिस होमको विज्ञापन गरेकी थिइन् भने केही दिनअघि उनले प्रदीपसँग प्रभु बैंकको फोटोसुट पनि गरेकी थिइन् । यता अनमोल र नीति भने मल्पी स्कुलका सहपाठी हुन् । स्टारडमको हिसाबले प्रदीपभन्दा अनमोल अघि रहेका कारण उनको प्राथमिकतामा भने अनमोल नै छन् । यो रुचि देखाउँछ उनको म्यानेजर छनोटले ।

नीतिले भर्खरै हायर गरेका म्यानेजर निराजन गिरी अनमोलको पनि काम हेर्छन् । योसँगै नीतिले अनमोलका पिता भुवन केसीलाई आफू फिल्म खेल्न तयार रहेको सन्देश पनि पुर्याइसकेकी छिन् । स्रोतका अनुसार उनले भुवन केसीलाई फोन गरेर नै आफू अनमोलसँग फिल्म खेल्न इच्छुक रहेको बताएकी थिइन् ।