युट्युबमा दर्शक आएपछि ‘डाँडाको वरपिपल २’ बनाउने शोभितको घोषणा

काठमाडौँ -विवादका बीच पनि हलमा दर्शक नपाएको ‘डाँडाको वरपिपल’को सिक्वेल बन्ने भएको छ । सामान्यतया विवादले फिल्मको पब्लिसिटी हुने र दर्शक हलमा आउने विश्वासमा फिल्मकर्मी रिलिजको समयमा हुने विवादलाई ननिको मान्दैनन् ।

तर राजेश हमाललाई छाडेर यसका निर्देशक शोभित बस्नेतले अरु कसैलाई महानायक मान्ने घोषणापछि सुरु भएको विवादले फिल्मलाई भने फाइदा गरेको थिएन । दसैँको मुखमा रिलिज भएको फिल्मलाई दर्शकलाई नकारिदिएका थिए । 

---

तर चारअघि युट्युबमा रिलिज भएको फिल्मले ठीकैका दर्शक पाएको छ । फिल्मले अहिलेसम्म १८ लाख दर्शक पाएको छ र नेपालको युट्युब ट्रेन्डिङमा पहिलो स्थानमा छ । युट्युबमा फिल्मले प्रतिक्रिया पनि राम्रो पाएको छ । यो सबै देखेर हौसिएका शोभित बस्नेतले यसको दोस्रो भाग बनाउने घोषणा गरेका छन् । उनले सामाजिक सञ्जालमा फिल्मको घोषणा गरेका हुन् । 

शोभित बस्नेतको निर्देशन रहेको फिल्ममा शिव श्रेष्ठ, गौरी मल्ल, सलोन बस्नेत, विनोद न्यौपाने आदि कलाकारको अभिनय रहेको थियो । भुवन केसीले अतिथि भूमिकामा अभिनय गरेका थिए ।