सलमान खानमाथि हत्या प्रयास !

मुम्बई - अभिनेता सलमान खानमाथि पनि हत्या प्रयास भएको मुम्बई प्रहरीको अनुसन्धानले जनाएको छ । पञ्जाबी गायक सिद्धु मुसे वालाको हत्याको अनुसन्धान गरिरहेको प्रहरीले संदिग्ध अपराधी लरेन्स बिश्नोईले सलमानलाई पनि मार्न मान्छे खटाएको तर पूर्व सूचना पाएर सलमान बाँच्न सफल भएको सूचना सार्वजनिक गरेको हो । 

टाइम्स नेटवर्कले प्रसारण गरेको सूचनाअनुसार बिश्नोईको आदेशमा निशानेबाज हकीको लठ्ठीमा पेस्तोल लगाएर सलमान खानलाई मार्न भनेर सलमानको घर ग्यालेक्सी अघि बसेको थियो । तर अन्तिम समयमा आएर उसले आफ्नो निर्णय परिवर्तन गरेको थियो ।

---

प्रहरीले मिडियामा दिएको सूचनाअनुसार सलमान खान बिहानै सेक्युरिटी गार्डविना साइक्लिङमा निस्कने र सोही समयमा सलमानमाथि गोली प्रहार गर्ने बिश्नोई र उनका सदस्यको योजना थियो । तर जुन दिन निशानेबाजले सलमानमाथि गोली प्रहार गर्ने योजना बनाएका थिए सोही दिन सलमान कुनै कार्यक्रममा जानु पर्ने भएकाले प्रहरी बिहानैदेखि सलमानको घर वरपर तैनाथ भएको देखेपछि निशानेबाज आफ्नो योजना फत्ते नगरी फर्कन बाध्य भएको थियो । 

बिश्नोईले लामो समयदेखि सलमानको हत्याको योजना बनाइरहेको पनि अनुसन्धानबाट खुल्न आएको प्रहरीले जनाएको छ । सलमानले कालो हरिणको शिकार गरेकोमा बिश्नोई समुदाय सलमानसँग रुष्ट रहँदै आएको छ । कालो हरिणलाई बिश्नाई समुदायले भगवान सरह मान्ने गरेका छन् । सलमानले ‘हम साथ साथ है’को फिल्मको सुटिङको समयमा जोधपुरमा कालो हरिणको शिकार गरेका थिए ।