'गुलाबी'मा नाजिर हुसेन

काठमाडौँ-  क्यानडाको टोरन्टो फिल्म स्कुलबाट निर्देशन कक्षा लिएर नेपाल फर्केकी समुन्द्र भट्टले केहि वर्ष पहिले 'आधा पेज' नामको फिल्म निर्देशन गरेकी थिइन् । केही वर्षको अन्तरपछि भट्ट पुनः फिल्म निर्देशनमा फर्किने भएकी छिन् । उनको निर्देशनमा फिल्म 'गुलाबी' बन्ने भएको छ ।

दि स्काइ ओसन इन्टरटेन्मेन्टको ब्यानरमा बन्न लागेको यो फिल्मको स्कृप्टको काम सकिएको र निर्माणको आन्तरिक तयारीमा जुटिरहेको भट्टले बताइन् । प्री प्रोडक्सनमा रहेको यो फिल्ममा हालै अभिनेता नाजिर हुसेनलाई अनुबन्ध गरिएको छ । नाजिर फिल्ममा मुख्य अभिनयमा रहनेछन् । नाजिरबाहेक अन्य कलाकारहरुको टुंगो लाग्न बाँकी रहेको र केही कलाकार अडिसनबाट छनोट गरिने बताइएको छ । यो बीचमा कलाकार विशाल पहाडीसँग भने सम्झौता भइसकेको बुझिएको छ ।

'यो फिल्मको लागि नाजिरले कम्तिमा १५ केजी तौल घटाउनुपर्नेछ', निर्देशक भट्टले भनिन, 'पछिल्लो एक महिनादेखि नाजिर यसको लागि प्रयासरत छन् ।' स्कृप्ट अनुसार नाजिरलाई ५० केजी तौलको पात्रमा तयार हुनुपर्नेछ ।

भदौ अन्तिममा छायांकनमा जाने लक्ष्यकाबीच निर्माण टिम तयारीमा जुटेको छ । फिल्मलाई आलोक शुक्लाले खिच्नेछन् । फिल्मले उठाउने कथावस्तुको बारेमा निर्माण टिमले आधिकारिक रूपमा कुनै पनि तथ्य बाहिर ल्याएको छैन । यद्धपी 'गुलाबी' नामले पारलैङ्गिक कथा उठाउन लागेको झलक दिन्छ ।

---