‘प्रकाश’ ट्रेलर : सरकारी शिक्षक बन्‍न प्रदीपको संघर्ष

काठमाडौँ - सशस्त्र युद्धको पृष्ठभूमिमा बनेको अर्को फिल्मको ट्रेलर सार्वजनिक भएको छ । मंगलबार सार्वजनिक भएको ‘प्रकाश’को ट्रेलरले पनि माओवादी द्वन्द्वलाई पृष्ठभूमिमा राखेर सरकारी शिक्षक बन्न संघर्ष गर्ने कथा प्रस्तुत गरेको छ । फिल्मको शीर्ष चरित्र प्रदीप खड्काले निर्वाह गरेका छन् । 

ट्रेलर सार्वजनिक कार्यक्रममा बोल्दै प्रदीपले यो फिल्ममा आफूले हिँडिरहेको बाटोभन्दा फरक बाटो हिँड्ने प्रयास गरेको बताए ।‘मैले पहिले गरेको भन्दा भिन्न भूमिका गरेको छ । सुरु सुरुमा यसका परिणामलाई लिएर अलि दुविधा थियो । तर पोस्टर र टिजरमा पाएको मायाले भोलि परिणाम जेसुकै भए पनि आज चाहिँ सुन्तुष्ट छु,’ प्रदीपले भने । उनले फिल्मको तयारीका लागि अनुप बरालका अभिनय र शारीरिक हाउभाउका कुरा सिकेकोदेखि जुम्लाको चरित्रमा डुब्न खाली खुट्टा हिँडेकोसम्म अनुभव सुनाएका थिए ।

---

प्रदीपको भनाइमा समर्थन जनाउँदै निर्देशक दिनेश राउतले प्रदीपले फिल्ममा प्रशस्त मेहनत गरेको बताउँदै फिल्मले कर्णालीको जनजीवनलाई रसिलो गरी प्रस्तुत गर्ने प्रयास गरेको बताए । उनले प्रदीपको पूर्व छविलाई लिएर सुरुमा आशंका भए पनि प्रदीपले सुटिङअघि नै गरेको मेहनतले ढुक्क बनाएको बताएका थिए ।

भदौ १० मा सार्वजनिक हुने फिल्ममा दिया मास्के र रेनु योगी पनि मुख्य भूमिकामा छन् । दिया मास्केले ‘प्रकाश’मा आफूले निर्वाह गरेको चरित्र अहिलेसम्मकै गाह्रो चरित्र भएको बताउँदै निर्देशक राउतको प्रशंसा गरेकी थिइन् । थिएटरको पृष्ठभूमिबाट आएकी रेनुको यो पहिलो फिल्म हो । फिल्ममा उनले प्रदीपको जोडी भएर अभिनय गरेकी छिन् ।