‘परदेशी २’ गीत :  केकीको प्रार्थनामा प्रकाश सपुतको खुल्दुली

काठमाडौँ - असोज १४ लाई प्रदर्शन मिति घोषणा गरेको फिल्म ‘परदेशी २’ले पहिलो गीत सार्वजनिक गरेको छ । प्रकाश सपुत र केकी अधिकारीको अभिनय रहेको गीत निर्देशक नारायण रायमाझीकै संगीत रहेको पुरानो गीत हो ।

‘के वर माग्यौ’ बोलको यो गीत नारायण रायमाझीकै संगीत रहेको ‘प्रीति’ एल्बममा समेटिएको थियो । उसबेला रामभक्त जोजिजूले गाएको यो गीतलाई फिल्मका लागि भने निशान भट्टराईले आवाज दिएका छन् । गीतमा रमेश पौडलको शब्द रचना रहेको छ । 

---

ट्रेलरभन्दा लामो टिजर सार्वजनिक गर्दै प्रदर्शन मिति घोषणा गरेको फिल्मलाई नारायण रायमाझीले नै निर्देशन गरेका हुन् । फिल्ममा प्रकाश सपुत र केकी अधिकारीबाहेक प्रशान्त तामाङ, वर्षा सिवाकोटी, दीलिप रायमाझीको पनि मुख्य भूमिका रहेको छ । 

प्रशान्त तामाङ र रजनी केसीको मुख्य भूमिका रहेको यो फिल्मको अघिल्लो भाग ४ वर्षअघि दसैँमा नै रिलिज भएको थियो । खाडीमा जानुपर्ने बाध्यताको कथा प्रस्तुत गरेको उसबेलाको फिल्मले अपत्यारिलो व्यापार गरेको थियो । नयाँ फिल्मले भने अमेरिकामा भासिने युवाको कथा प्रस्तुत गर्ने टिजरको संकेत छ । फिल्मलाई राजेश वंशल र नारायण रायमाझी मिलेर निर्माण गरेका हुन् ।