म्युजिक भिडियोको भ्युज मलिकालाई फिल्ममा काम लाग्यो त ?

काठमाडौँ - मलिका महत म्युजिक भिडियोमा महंगी मोडल हुन् । उनलाई भिडियो खेलाउन म्युजिक भिडियोका निर्माता÷निर्देशकले राम्रै रकम तिर्ने गरेका छन् । एक समय त यस्तो थियो, पल शाह र मलिका महत खेलेका भिडियो करोड क्लबमा सजिलै छिर्थे ।

भिडियोको क्रेज देखेर पल र मलिकालाई लिएर फिल्म बनाउने सपना देख्ने पनि कम थिएनन् । तर यसका लागि बाधक थियो कोभिड १९ को महामारी । महामारी चल्दा चल्दै नाबालिग बलात्कार अभियोगमा पल शाह पुर्पक्षका लागि जेल चलान भएपछि, धेरैको सपना तुहियो । 

---

तर यो बीचमा मलिकाले अभिनय गरेको दोस्रो फिल्म ‘पानीफोटो’ हलमा लाग्न बाँकी नै थियो । ‘यात्रा’बाट अभियन यात्रा सुरु गरेकी मलिकालाई यो फिल्मले अभिनय यात्रालाई उचाइ दिने विश्वास थियो । निर्माण समूहलाई पनि विश्वास थियो, मलिकालाई म्युजिक भिडियोमा हेर्न हत्ते गर्नेहरू कम्तीमा एक चौथाइ नै सही हलमा पनि हेर्न आउनेछन् ।

तर ‘पानीफोटो’को ओपनिङले देखायो, म्युजिक भिडियोका दर्शक फिल्मका पनि दर्शक हुन्छन् भन्ने कुनै ग्यारेन्टी छैन । मलिकाको म्युजिक भिडियोमा ‘म मलिकाको फ्यान’ भन्दै कमेन्ट गर्ने दर्शक हलमा उनको फिल्म लाग्दा भने देखिएनन् । फलतः फिल्मले न राम्रो सुरुवात पायो न अन्त्य । यसले मलिकालाई दोस्रो गाँसमा पनि ढुंगा लागेको छ । न पहिलो फिल्म चल्यो न दोस्रो ।