‘कमेडी क्लब विथ च्याम्पियन्स’ को २६ अंके सेलिब्रेसन

काठमाडौँ-  नेपाल टेलिभिजनबाट तथा ओएसआर डिजिटलबाट प्रसारण भइरहेको चर्चित कमेडी रियालिटी सो ‘कमेडी क्लब विथ च्याम्पियन्स’को टिमले कार्यक्रमको सेलिब्रेसन गरेको छ । सो प्रसारणको २६ भाग पुगेको अवसरमा आइतबार काठमाडौंमा पत्रकार सम्मेलनको आयोजना गर्दै केक काटिएको हो ।

सोका निर्देशक विशाल भण्डारीले सुरुवातमा कार्यक्रमलाई अगाडि बढाउन केही गाह्रो भएपनि अहिले दर्शकको माया पाउँदा खुसी लागेको बताए । सुरुवातमा युट्युबमै भ्यूज नपाउँदा समस्या भएपनि अहिले हरेक सो १० लाखभन्दा बढीले युट्युबमा हेरेको भन्दै उनले नयाँ नयाँ सोचका साथ सोलाई अगाडि बढाउने बताए ।

---

कार्यक्रममा प्रमुख अतिथिको रुपमा पुगेका हास्य कलाकार दीपकराज गिरीले भने–‘पहिलो भागमा म अतिथिको रुपमा पुगेको थिएँ । सो समयमा कलाकारहरुले मलाई हसाउन सकेनन् । तर, अहिले सो गज्जब तरिकाले अगाडि बढिरहेको छ । यो सोमा सहभागी भाइबहिनीको प्रगति देखेर खुसी लागेको छ ।’

यस्तै, सोकी अध्यक्ष दीपाश्री निरौलाले पनि नयाँ पुस्ताले कमेडीलाई नयाँ तरिकाले अगाडि बढाएको भन्दै खुसी व्यक्त गरिन् । उनले, सोमा काम गर्दा पारिवारिक वातावरणमा रमाइलो शैलीमा काम गर्ने गरेको पनि खुलाइन् ।

‘कमेडी क्लब विथ च्याम्पियन्स’को अबको बाँकी भाग कमेडियन विक्की अग्रवालले निर्देशन गर्ने जानकारी पत्रकार सम्मेलनमा दिइयो । १० भागसम्म विक्कीले नै निर्देशन गरेको सोको बाँकी भाग विशालले अगाडि बढाएका थिए । तर, अब बाँकी भाग विक्कीले नै सुरु गर्नेछन् ।

यो सोमा सुमन कार्की, कैलास कार्की, पवन भट्टराई, उषा रजक, उमेश राई, साजन श्रेष्ठ, विक्की अग्रवाल, मेक्सम गौडेलले आफ्नो प्रस्तुति दिँदै आएका छन् । कार्यक्रममा सबै कलाकारहरुले दर्शकले दिएको माया कारण हरेक साता केही नयाँ गर्न मन लाग्ने सुनाए । कि एड्भटाइजिङ र थर्ड आई प्रोडक्सनसँग मिलेर यो सो निर्माण गरेको हो । यो सो आउँदो वर्षको असार मसान्तसम्म चल्नेछ ।