‘प्रेमगीत ३’ हिन्दी र नेपाली एकै दिन हलमा

काठमाडौँ - विश्वमा नेपाली फिल्मको बजार विस्तारका लागि भन्दै विकास बोर्डबाट रिलिज अगावै सम्मान खाएका निर्माता सन्तोष सेनले नेपालमै हिन्दी भर्जन पनि रिलिज गर्ने घोषणा गरेका छन् । सेनका अनुसार नेपाली भर्सनसँगै हिन्दी भर्सन पनि असोज ७ मै रिलिज हुनेछ । उनले मधेशसँगै सिंगो कलाप्रेमीको मागलाई केन्द्रमा राख्दै आफूहरूले दुवै भर्जन रिलिज गर्ने निर्णय गरेको जनाएका छन् ।

सुरुमा यो फिल्म भारतमा रिलिज गर्ने बताइएको थियो तर पछि निर्माताले नेपालमा पनि हिन्दी भर्जन रिलिज हुने जानकारी चुहाएका थिए । तर समय बताएका थिएनन् । अन्ततः उनले एकै दिन दुवै भर्जन रिलिज गर्ने घोषणा गरेका छन् । 

---

हाल भारतमा प्रचार प्रसार भइरहेको फिल्मले मुस्ताङको पृष्ठभूमिमा रहेर प्रेम र राजगद्दीका लागि हुने लडाइँलाई प्रस्तुत गर्नेछ । फिल्ममा प्रदीप खड्का, क्रिस्टिना गुरुङ, शिव श्रेष्ठ, सुनिल थापा, मनिष राउत आदि कलाकारको अभिनय रहेको छ ।