‘२ नम्बरी’को शीर्ष गीत तयार पारेर भूषणले जिते ५० हजार

काठमाडौँ - रेड बर्ड प्रोडक्सनको प्रस्तुतिमा तयार भएको फिल्म ‘२ नम्बरी’ असोजको २१ गतेबाट रिलिज हुँदैछ । यो फिल्मको शीर्ष गीतका लागि यसको निर्माणपक्षले केही साता अगाडि प्रतियोगिता नै राखेको  थियो ।

शीर्ष गीतका लागि ६१ वटा गीत प्राप्त भएको निर्माणपक्षले जनाएको छ । जसमध्ये, भूषण खतिवडाको गीतलाई निर्माण पक्षले  उत्कृष्ट मानेको हो । भूषणको यो गीत फिल्ममा प्रयोग हुनेछ । साथमा उनले ५० हजार नगद पुरस्कार समेत जितेका छन् । अब, फिल्मको शीर्ष गीतमा उनकै शब्द, संगीत र स्वर रहने प्रस्तुतकर्ता किरण नेपालीले जानकारी दिए ।

---

दीपक मनाङ्गे, अमलादेवी राई र जयश श्रेष्ठको लगानी रहेको फिल्मका कार्यकारी निर्माता सरोज नेपाली हुन् । फिल्ममा दीपेन्द्र लामाको कथा तथा निर्देशन छ ।
यो फिल्ममा दयाहाङ राई, सौगात मल्ल, उपासना सिंह ठकुरी, वुद्दि तामाङ, उगेन छोदेन लगायतका कलाकारको मुख्य भूमिका छ ।
फिल्मको टिजर र एउटा गीत सार्वजनिक भैसकेको छ । दर्शकले, यो फिल्मको टिजरलाई निक्कै मन पराएका छन् ।