चैत १० मा ‘म राजेश हमाल’

काठमाडौँ -  अभिनेता राजेश हमाललाई ट्रिब्युट स्वरुप निर्माण भएको फिल्म ‘म राजेश हमाल’ले फस्टलुक पोस्टरसहित प्रदर्शन मिति सार्वजनिक गरेको छ । जोन योञ्जनद्धारा निर्देशित फिल्म चैत १० गते प्रदर्शन हुनेछ । 

निर्माता केदार भुसालको जन्मदिन पारेर सार्वजनिक पोस्टरले नयाँ गन्तव्यमा निस्किएको युवतीको मनोभावलाई प्रस्तुत गरेको छ । छुट्दै गरेको ट्रकलाई पछ्याई रहेकी युवती नयाँ गन्तव्यको खोजीमा रहेको कुरालाई संकेत गरेको छ । 

---

फिल्ममा अस्मिता लामिछाने, सञ्चिता लुइँटेल, मुकुन भुसाल, महेश त्रिपाठी, एभनराज उप्रती र सञ्जोग रसाइलीको मुख्य भूमिका रहेको छ । फिल्ममा आर्यन सिग्देलको अतिथि भूमिका रहेको छ ।  जोनले सायद कार्कीसँग मिलेर लेखेको पटकथालाई आलोक शुक्लाले छायांकन गरेका हुन् ।

फिल्ममा राजेश हमालको पनि अतिथि भूमिका रहने चर्चा थियो तर निर्माण टिमले उनी फिल्ममा रहेको वा नरहेको कुरा सार्वजनिक गरिसकेको छैन । निर्माण टिमले ‘राजेश हमाल सुपरस्टार मात्र होइन भावना पनि हो’ भन्ने ट्याग लाइनसहित फिल्म राजेश हमालको जीवनी नभई उनको व्यक्तित्वबाट प्रभावित फिल्म भित्रको चरित्रको कथा भएको बताउँदै आएको छ । अस्मिता लामिछानेले हमालबाट प्रभावित हुने शीर्ष चरित्र निर्वाह गरेकी छिन् ।