दृश्य काँटछाट गरेर ‘दुई नम्बरी’ चलचित्र चलाए पछि विकास बोर्डको पत्र

काठमाडौँ- दृश्य काँटछाँटसहित फिल्म प्रदर्शन गरेको विषयलाई लिएर चलचित्र विकास बोर्डले ‘दुई नम्बरी’का निर्मातालाई दुई दिने स्पष्टीकरण सोधेको छ । 

फिल्म सम्पादन गरेको, दृश्य घटाएको र ध्वनिमा परिवर्तन गरेको हो वा होइन भन्दै बोर्डले लिखित स्पष्टीकरण सोधेको हो । सदस्य सचिव महेश पराजुलीले दुई दिनभित्र बोर्डले सोधेको प्रष्टीकरण दिन निर्माण कम्पनी रेडबर्ड प्रोडक्सनलाई पत्रसमेत काटेको हो ।

---

बिहीबार निर्माताले दर्शकको मागलाई ध्यानमा राख्दै फिल्मलाई पुन: सम्पादनसहित रिलिज गरिएको जानकारी दिएका थिए ।

दिपेन्द्र लामाद्वारा निर्देशित चलचित्र तेस्रो सातामा लाग्नु अघि दृश्यहरूमा केही फेरबदल गरेर पुन: चलचित्र चलाउने निर्णय गरेको थियो । चलचित्र दुई नम्बरी ब्लकबस्टर हिट भएको निर्देशक लामाले बताउँदै आएका छन् ।

चलचित्रले नाफा कमाए पछि निमार्ण पक्षले प्राविधिकहरूलाई केही रकम सहयोग गर्ने सार्वजनिक गरेको थियो ।