पंकज त्रिपाठी ओटीटीमा नम्बर वन स्टार

मुम्बई - पंकज त्रिपाठी ओटीटीका नम्बर वन स्टार मानिएका छन् । ओटीटी स्टारको रेटिङमा सर्वाधिक नम्बर पाउँदै पंकज त्रिपाठी एक नम्बर घोषित भएका हुन् । आमेक्स मिडियाले ४ महिनामा ओटीटीमा सार्वजनिक फिल्म तथा सिरिजलाई लिएर गरेको सर्वेक्षणमा दर्शकले पंकज त्रिपाठीलाई सबैभन्दा बढी नम्बर दिएका हुन् । आमेक्सले यही सालको जुलाइदेखि सेप्टेम्बरसम्ममा रिलिज फिल्म तथा सिरिजलाई लिएर सर्वेक्षण गरेको हो । पंकज त्रिपाठी गत वर्ष पनि ओटीटीमा एक नम्बर रुचाइएका अभिनेता मानिएका थिए ।

दोस्रो नम्बरमा भने मनोज बाजपेयी अटाएका छन् । उनको यो साल ‘फेमिलीमेन २’ सार्वजनिक भएको थियो । ‘पञ्चायत २’ र ‘जादूगर’ जस्ता फिल्ममा देखिएका जितेन्द्रकुमार तेस्रो स्थानमा छन् । चौथो नम्बरमा भने दर्शकले दक्षिण भारतीय अभिनेत्री सामान्थालाई राखेका छन् । सामान्था पनि ‘फेमिलीमेन २’मै देखिएकी थिइन् । 
सर्वेक्षणले पाँचौँ स्थानमा भने नवाजुद्धिन सिद्धिकीलाई देखाएको छ । तर नवाजुद्धिनले अबदेखि ओटीटीमा मात्र सार्वजनिक हुने फिल्म नगर्ने बताइसकेका छन् । छैटौँ र सातौँ नम्बरमा क्रमशः अजय देवगन र राधिका आप्टे छन् । आठौँ नम्बरमा भने मिथिला पालकारले ठाउँ बनाएकी छिन् । नवौँ र दसौँ नम्बरमा अली फजल र बबी देओल छन् । आमेक्सले हरेक चार महिनामा श्रेणी सूची सार्वजनिक गर्ने गरेको छ ।  

---