वितरकको जुँगाको लडाइँमा ‘छक्का पञ्जा ४’ र ‘छड्के २’को भिडन्त

काठमाडौँ - फागुन १९ मा नेपाली निर्माताको ताँती लागेको छ । एकपछि अर्को गर्दै निर्माताहरूले आफ्नो फिल्म यो मितिमा रिलिज गर्ने घोषणा गरेका छन् । पहिले नै ४ फिल्मले यो मितिमा फिल्म रिलिज गर्ने घोषणा गरेका थिए ।

मंगलबार बिहान यो मितिमा अनमोल केसीको ‘छड्के २’ले पनि आउने घोषणा गरेको छ । निर्माण टिमले प्रदर्शन मितिसहितको पोस्टर राख्दै फागुन १९ मा यो फिल्म रिलिज हुन लागेको जनाएका हुन् ।  यसअघि परस्त्री, वर एन्ड वधु, बुलाकी र छक्का पञ्जा ४ ले फागुन १९ मा प्रदर्शन हुने घोषणा गरेका थिए । 

---

‘छक्का पञ्जा ४’ र ‘छड्के २’ एकै मितिमा आउने निर्णयलाई धेरैले वितरकको जुँगाको लडाइँको रुपमा लिएका छन् । बजार चर्चाअनुसार ‘छक्का पञ्जा ४’लाई बैंकटेश फिल्मले २ करोड मिनिमम ग्यारेन्टीमा लिएको छ भने वितरक सुनिल मानन्धरले पनि ‘छड्के २’का लागि उति नै रकम तिरेको बताइएको छ ।

एक अर्कालाई गलाउने उद्देश्यले यो मितिमा दुई फिल्म आउन लागेको अनुमान गर्न सकिन्छ । परस्त्री, वर एन्ड वधु, बुलाकीले भने पहिले नै यो मिति बुक गरेका थिए । तर यो मितिमा ‘छक्का पञ्जा ४’ आएपछि यी फिल्म तितरबितर हुने तय छ ।