‘राजा’का लागि हिराेइन खोज्दै राज कटुवाल

काठमाडौँ - ‘लीला’, ‘लाल्टिन’ आदि फिल्ममा सानोतिनो भूमिका निर्वाह गरेका चलचित्र विकास बोर्ड सदस्य राज कटुवाल ‘राजा’ फिल्मबाट सोलो हिरोको रुपमा अगाडि आउने सोचमा छन् । लगभग डेढ दुई वर्ष अघि नै घोषणा भएको फिल्मको काम भने बल्ल अघि बढेको छ ।

राजका अनुसार फागुनमा सुटिङ गर्ने गरी फिल्मको काम अगाडि बढिरहेको छ र राज अहिले हिरोइनको खोजीमा लागेका छन् । एक्सन प्रधान फिल्मका लागि आफ्नो जोडी सुहाउँदो हिरोइन खोजिरहेका हुन् । उनले यसका लागि नयाँभन्दा पनि अनुभवी हिरोइनमा आँखा लाइरहेको बताएका छन् । 

---

‘पुरानै लिने भन्ने सोच छ तर कोसँग काम गर्ने भन्ने निर्क्यौल भइसकेको छैन । हामी छलफलकै क्रममा छौँ,’राजले इकागजसँगको कुराकानीमा भने । उनले खुलेर कुरा नगरे पनि स्रोतका अनुसार राज जसिता गुरुङसँग कुरा अगाडि बढाउने सोचमा छन् । लन्डन बस्दै आएकी जसिता अहिले सुपर डान्सर नेपालको सुटिङका लागि सहरमा छिन् ।

जसिताबाहेक निर्माण टिम स्वस्तिमा खड्का र उपासना सिंहसँग कुरा अगाडि बढाउने सोचमा छ । यसका लागि स्क्रिप्टको खाका तयार नभइसकेकाले ठोस कुरा भने अगाडि बढ्न नसकेको स्रोत बताउँछ । फिल्मको पटकथा दिवाकर भट्टराईले लेखिरहेका छन् ।