‘ह्यारी कि प्यारी’को गीत सार्वजनिक, ‘धरहरा’ हल्लाउने रेखाको नृत्य

काठमाडौँ - फिल्म ‘ह्यारी कि प्यारी’को पहिलो गीत ‘धरहरा’ रिलिज भएको छ । बुधबार औपचारिक कार्यक्रम गर्दै फिल्मको गीत सार्वजनिक गरिएको हो । सार्वजनिक गीतमा अभिनेत्री रेखा थापाको नृत्य छ । शिखर सन्तोषको  संगीत, डाक्टर भोला रिजालको शब्द रचना रहेको सपन कुमार राई र मिना निरौलाको स्वर छ । कविराज गहतराजको कोरियोग्राफी रहेको गीतमा अभिनेत्री थापासँगै अभिनेताद्धय जितु नेपाल र विजय बराल पनि फिचर्ड छन् ।

 

कार्यक्रममा बोल्दै रेखा थापाले डाक्टर भोला रिजालको ब्यानरमा एउटा गीतमै सही जोडिन पाउँदा खुसी लागेको बताइन् । रेखा थापा फिल्ममा गीतमा मात्र देखिनेछिन् । जितुले निर्देशक कपिल रिजालले आफूलाई हिरोको रुपमा पत्याएकोमा बारम्बार विश्वास नलाग्ने स्मरण गरे । उनले यसअघि कमेडी फिल्ममा मात्र देखिने गरेकोमा यसमा आफू गम्भीर भूमिकामा देखिने उनले बताएका थिए । 

---

बिआर प्रोडक्सनकको प्रस्तुतिमा निर्माण भएको फिल्ममा जितु, विजय र साम्राज्ञीसँगै लक्ष्मी गिरी, सुवास गजुरेल, नरेश पौडेल, रञ्जना भट्टराई, समीक्षा पौडेल, रमेश अधिकारी, डिल्लीराम खनालको पनि अभिनय रहेको छ । डाक्टर कपिल रिजालको प्रस्तुति निर्माण भएको फिल्ममा रिजाल स्वयंमको कथा तथा निर्देशन, सुदीप बराल, गिरीराज घिमिरे, डाक्टर रिजाल, अभिमन्यू निरवीले मिलेर पटकथा र संवाद लेखेका हुन् । दन्त चिकित्सक डाक्टर कपिल रिजालले यही सिनेमाबाट निर्देशनमा डेब्यू गर्दैछन् । सुदीप बरालले छायांकन गरेको फिल्मलाई अर्जुन जिसीले सम्पादन गरेका हुन् ।