त्रिकोणात्मक प्रेमकथामा ‘गुञ्जन’को दोस्रो ट्रेलर

काठमाडौँ -  केही समयअघि पहिलो ट्रेलर सार्वजनिक गरेको ‘गुञ्जन’ले बिहीबार दोस्रो ट्रेलर सार्वजनिक गरेको छ । औपचारिक कार्यक्रम गर्दै सार्वजनिक ट्रेलरले फिल्म त्रिकोणात्मक प्रेमकथा भएको संकेत गर्छ । फिल्ममा सारा सिरपाइलीलाई पाउन डेब्यू अभिनेता प्रितमराज सेन्चुरी र कबिर खड्काको घम्साघम्सी देख्न सकिन्छ ।

ट्रेलर सार्वजनिक कार्यक्रममा फिल्म उत्कृष्ट रहेको दाबी गर्दै निर्माता हिराकृष्ण शाहीले फिल्म मन नपरे पैसा फिर्ता दिने घोषणा गरे ।  शाहीको भनाइ थियो –‘यदि, फिल्म मन परेन भने दर्शकले मेरो नम्बरमा फोन गर्न सक्नुहुन्छ । फिल्म मन नपर्नुको कारण सोध्छु । त्यसपछि दर्शकले काटेको टिकटको सबै पैसा फिर्ता गर्नेछु ।'

---

फिल्मलाई अष्ट महर्जनले निर्देशन गरेका हुन् । फिल्ममा हिरा कृष्ण शाही र सुनिता शाहीको लगानी छ । महेश दवाडीको कथामा तयार भएको फिल्ममा राजेश श्रेष्ठको छायांकन, कविराज गहतराजको कोरियोग्राफी, विपिन मल्लको सम्पादन छ ।कार्यक्रममा बोल्दै निर्देशक अष्टमान महर्जनले दुई दशक लामो द्धन्द्ध निर्देशन करिअरको अनुभव समेटेर फिल्म निर्देशन गरेको बताए । उनले फिल्मको मुख्य कथा प्रेम भएपनि फिल्ममा अचारको रुपमा द्धन्द्धको पनि स्वाद चाख्न सकिने जानकारी गराए । फिल्ममा सरोज खनाल, हिउवाला गौतम आदि कलाकारको पनि अभिनय रहेको छ ।