‘गुञ्जन’ र ‘तिम्रो मेरो साथ’को चिसो सुरुवात

काठमाडौँ - आजबाट हलमा आएका ‘गुञ्जन’ र ‘तिम्रो मेरो साथ’ दर्शक लोभ्याउन असफल भएका छन् । दुवै फिल्मका बिहानी तथा दिवा सोमा दर्शक देखिएनन् । मौसमको चिसो हलमा लागेका फिल्ममा पनि सरेको छ । 

निर्माताको रोजाइमा पर्दै आएकी साम्राज्ञीराज्य लक्ष्मी शाह र पुष्प खड्का अभीनित ‘तिम्रो मेरो साथ’ले आक्रामक पब्लिसिटी गरेको थियो । निर्माता÷निर्देशक कलाकारको टोली लिएर मेला महोत्सव र देशबाहिरका मुख्य सहरमा दौडिएका थिए । तर पहिलो दिन फिल्ममा यो दौडको असर देखिएन । उता ‘गुञ्जन’को पनि हालत यही छ । सुस्त पब्लिसिटी गरेको यो फिल्ममा पनि दर्शकको रुची देखिएको छैन । फिल्ममा नयाँ अभिनेता प्रितमराज सेन्चुरीसँगै सारा सिरपाइली र कबिर खड्काको अभिनय रहेको छ ।

---

‘तिम्रो मेरो साथ’को सुरुवाती प्रदर्शनसँगै ब्याक टु ब्याक हिट दिएर अभिनय यात्रा सुरु गरेकी साम्राज्ञीलाई तेस्रो हिटको खोजी लामो हुने देखिएको छ । उनले सुरुमा अभिनय गरेका ‘ड्रिम्स’ र ‘ए मेरो हजुर २’ हिट भएका थिए । त्यसयता भने उनले अभिनय गरेका फिल्मले हिटको ट्याग पाउन सकेका छैनन् । यसले अब दुई हप्तापछि रिलिज हुने साम्राज्ञीको ‘ह्यारी कि प्यारी’माथि पनि दबाब बढाएको छ । माघ २० मा यो फिल्म प्रदर्शन हुँदैछ ।