‘बिहे पास’ टिजर : आफैँले थापेको झुठको पासोमा दयाहाङ

काठमाडौं - नयाँ वर्षलाई प्रदर्शन मिति घोषणा गरेको ‘बिहे पास’ को टिजर बुधबार सार्वजनिक गरिएको छ । दयाहाङ राई र प्रकृति श्रेष्ठ स्टारर करिब साढे १ मिनेट लामो टिजर बुढा सुब्बा डिजिटलमार्फत दर्शकमाझ ल्याइएको हो । 

फस्र्टलुक पोस्टर सार्वजनिकसँगै चर्चामा रहेको ‘बिहे पास’ को टिजरमा दयाहाङ र प्रकृतिलाई पति पत्नीको रुपमा देखाइएको छ । टिजरले प्रकृति सरकारी जागिरे रहेको र प्रकृतिलाई फकाउन दयाहाङ पनि यसैको चक्करमा लागेका छन् । तर यही बीचमा दयाहाङले एकपछि अर्को झुठ बोल्दै गएको टिजरले बताउँछ ।  

---

प्रवेश पौडेलको निर्देशनमा रोहित कटेल र रत्न श्रेष्ठले निर्माण गरेको फिल्ममा दयाहाङ र प्रकृतिका साथमा श्याम राई, विशाल पहाडी,सुवास गजुरेल, हिउँवाला गौतम, रुषा न्यौपाने, नवीन शेरचन, उमा बानियाँ र प्रकाश भुजेलले अभिनय गरेका छन् । शिव ढकालले खिचेको फिल्मका गीतमा प्रवेश मल्लिकको संगीत, डिपी खनालको गीत, शैलेन्द्र प्रधानको पाश्र्व संगीत छ । रामजी लामिछानेको कोरियोग्राफी रहेको फिल्म मित्र गुरुङले सम्पादन गरेका हुन् । मर्रे केर, आकाश बराल र सजन काफ्लेको कथा रहेको फिल्मको पटकथा र सम्वाद भने आकाश र सजनले तयार पारेका हुन् । 

आरआर फिल्म प्रोडक्सनको निर्माण र वितरण रहेको फिल्म पूर्वी नेपालका विभिन्न रमणीय स्थलमा खिचिएको हो । रोहित कटेलको प्रस्तुति, रत्न श्रेष्ठ कार्यकारी निर्माता, रोजन श्रेष्ठ निर्माता, ग्याल्जेन लामा र बालकृष्ण पाख्रिन सहनिर्माता रहेको फिल्मलाई निर्माण पक्षले २०८० को पहिलो दिन प्रदर्शन गर्न लागेको बताउँदै आएको छ ।