राम्रो व्यापार गरिरहेको 'जारी' का निर्देशक र कलाकार के भन्छन् ?

काठमाडौँ - नेपाली चलचित्र 'जारी' अहिले प्रदर्शन भइरहेको छ । चलचित्रले राम्रो प्रतिक्रिया पाइरहेको चलचित्र निर्माण टिमले जनाएको छ । उनीहरूले बुधबार पत्रकार सम्मेलन गर्दै दर्शकबाट राम्रो प्रतिक्रिया पाइरहेको बताएका छन् ।

निर्देशक उपेन्द्र सुब्बाले नेपाली समाजमा सबैभन्दा स्वतन्त्र जीवन जिउने महिलाहरू लिम्बू समुदायमा रहेको बताए । तर, पनि उनीहरूको स्वतन्त्रता घरका मान्छेले कहाँ गइस् भनेर नसोध्नु मात्रै होइन भन्ने कथावस्तु आफूले देखाउन खोजेको उनले बताए । महिलाहरूले पैतृक सम्पत्तिको उपभोग गर्न नपाउन्जेल अन्य स्वतन्त्रताको अर्थ रहन्न भन्ने यथार्थलाई चलचित्रमा देखाउन खोजेको उनको भनाइ छ । ‘नेपाली समाजमा खुला समाज भनेको लिम्बूहरूको हो । बढी स्वतन्त्रता लिम्बूहरूले नै उपभोग गरिरहेका छन् भन्ने गरिन्छ,' उनले भने, 'यहाँभित्र महिलाहरूको हक बढी हुन्छ भन्ने कथन छ । मलाई यत्तिले मात्रै पुग्दैन भनेर लागेको हो । जबसम्म छोरीमा पैतृक सम्पत्तिको हक लाग्दैन तबसम्म अरु स्वतन्त्रता फिक्का रहन्छन् भन्ने सोचेर नै जारी बनाउने सोच निकालेँ । बनाउँदा बनाउँदै के के बनाएँ नै थाहा छैन ।’

---

अभिनेता दयाहाङ राईले लिम्बू संस्कृतिसँग सम्बन्धित चलचित्र भएकाले काम गर्न केही कठिनाइ भए पनि आफू लिम्बू संस्कृतिसँग धेरै नजिक हुँदा सहज लागेको बताए । उनले सांस्कृतिक हिसाबले पनि आफूलाई अभिनय गर्न सहज भएको बताए । ‘धेरैले राम्रो प्रतिक्रिया दिनुभएको छ । मलाई काम गर्न केही कल्चरको हिसाबले उस्तैउस्तै भएर धेरै नै सहज भयो, अभिनय निभाउनलाई । कल्चर मिल्दोजुल्दो थियो, हृदम पनि मिल्दोजुल्दो थियो,' उनले भने, 'स्क्रिप्ट छर्लङ्ग थियो, त्यो मेरो लागि चुनौती थियो । रिस, प्रेम, इगो सबै थियो । सांस्कृतिक हिसाबले पनि मलाई अभिनय गर्न धेरै सहज भयो ।’

अभिनेत्री मिरुना मगरले अन्य चलचित्रमा अभिनय मात्रै हुने भए पनि जारीमा पात्रअनुसार भिजेर अभिनय गर्न पाएको बताइन् । उनले चलचित्रमा अभिनय गर्दा पात्रको विषयवस्तुलाई महसुस गरेर काम गरेकाले राम्रो प्रतिक्रिया पाइरहेको बताइन् । ‘मैले काम गरेका चरित्रहरूमा जारी भन्दा भिन्न थियो । जारीको स्क्रिप्ट पढ्दा नै मैले धेरै नै भिन्न पाएको थिएँ,' उनले भनिन्, 'मलाई स्क्रिप्ट पढ्नेवित्तिकै काम गरेको जस्तो फिल हुन्छ होला भन्ने लागेको थियो । मैले यो चरित्रमा वास्तविक अभिनय गर्ने प्रयास गरेको छु । चलचित्रमा मैले पात्रको अभिनयलाई महशुस गरेर काम गरेँ र धेरैकुरा सिक्न पाएँ ।’

त्यस्तै अभिनेता विजय बरालले लिम्बू समुदायको कथावस्तुलाई चलचित्रमा उतारिएकोले त्यही अनुसारको पात्र बन्दा केही कठिनाइ भएको बताए । उनले लिम्बू भाषा बोल्नै नजान्नेलाई सबैभन्दा बढी लिम्बू भाषा प्रयोग गर्नुपर्ने पात्र बनाउँदा केही कठिनाइ भएको तर सिक्दै जाँदा सहजै अभिनय गर्न सकेको बताए ।

लिम्बू समुदायको संस्कृतिलाई विषयवस्तु बनाइएको ‘जारी’ मा श्रीमती फिर्ता ल्याउन संघर्षरत श्रीमानको कथा समेटिएको छ । कवि उपेन्द्र सुब्बाको निर्देशन रहेको चलचित्रमा अभिनेता राईसँगै मिरुना मगर, विजय बराल, कमलमणि नेपाल, रेखा लिम्बू लगायतले अभिनय गरेका छन् । जारी नयाँ वर्षको दिन देशभर प्रदर्शनमा आएको थियो । चलचित्रले राम्रो व्यापार गरिरहेको छ ।