‘फर्की फर्की’मा अनमोल र जसिताको जोडी

काठमाडौँ- धेरै पहिले ‘एन्टी हिरो’मा सहकार्य गर्न ठीक्क परेका अनमोल केसी र जसिता गुरुङको जोडी त्योे फिल्म नबनेपछि अपुरै थियो । अब भने निर्माता रोहित अधिकारीले यो जोडीलाई एक साथ पर्दामा उतार्ने भएका छन् । शुक्रबार अनमोललाई औपचारिक रुपमा अनुबन्ध गराउँदै निर्माता अधिकारीले यो जोडीको जुगलबन्दी पक्का गरेका हुन् । 

‘फर्की फर्की’ नाम जुराइएको यो फिल्मलाई सुयोग गुरुङले निर्देशन गर्नेछन् । उनले यसअघि शिल्पा मास्के र आयुष्मान जोशीलाई लिएर ‘सानो मन’ बनाएका थिए । 
यो फिल्मको सुटिङको समय सार्वजनिक भइसकेको छैन तर यो फिल्मको घोषणासँगै अनमोलले अभिनय गर्ने भनेर लामो समय वर्कसपसमेत भएको फिल्म ‘जेरी अन द टप’ भने तत्काल नबन्ने भएको छ । अनमोलले होम प्रडक्सनको फिल्म पनि यही समयमा गर्ने तयारी गरिरहेका छन् । ‘पारस’ र ‘माइतीघर २’लाई थाँती राख्दै निर्माता भुवन केसीले नयाँ प्रेमकथामा फिल्म बनाउने घोषणा गरेका छन् ।

---

एउटा क्लिन हिटको खोजीमा रहेकी जसितालाई यो फिल्मले राहत दिनेछ । ‘लिली बिली’बाट अभिनय यात्रा सुरु गरेकी जसिताका फिल्म बक्स अफिसमा असफल हुँदै आएका छन् । उनको पछिल्लो रिलिज ‘ज्याकी ः आइ एम ट्वान्टी वन’ले यही इतिहास दोहोर्याएको थियो ।