धरानमा पनि ‘आदिपुरुष’ प्रदर्शन नगर्न हर्कको आग्रह

काठमाठौँ - काठमाडौ महानगर पालिकाका मेयर बालेन्द्र शाहले ‘आदिपुरुष’ नचलाउने निर्णयको समर्थन काठमाडौँबाहिर फैलिएको छ । पोखराका मेयरले चलचित्र नचलाउन निर्देशन दिएको पत्र सार्वजनिक भइसकेको छ । 

यसैबीच धरानका मेयर हर्क साम्पाङले पनि आदिपुरुष नचलाउन आग्रह गरेका छन् । उनले सोमबार सामाजिक सञ्जालमा छोटो स्ट्याटस लेख्दै फिल्म नचलाउन आग्रह गरेका छन् । ‘धरानमा आदिपुरुष नचलाउनु होला । जय देश !’उनले स्ट्याटसमा लेखेका छन् ।

---

भारतीय फिल्म ‘आदिपुरुष’मा सीतालाई भारतकी छोरी भनेर उल्लेख गरेसँगै नेपालमा यो फिल्मको विरोध भइरहेको थियो । तर नेपालको सेन्सर बोर्डले भने भारत शब्द म्युट गर्न लगाएर प्रदर्शन अनुमति दिएको थियो । यसको प्रतिक्रियामा बालेन्द्र शाहले भने संसारभर जाने फिल्मबाटै यो संवाद हटाउनु पर्ने माग गर्दै तीन दिनको अल्टिमेटम दिएका थिए । तीन दिनमा निर्माण कम्पनीले यो संवाद नसच्याए सारा हिन्दी फिल्मको प्रदर्शन रोक्ने चेतावनी दिएका थिए । समयसीमा सकिने साँझ निर्माण कम्पनीले टिसिरिजले बोक्रो माफी मागे पनि चलचित्रमा त्यस्तो संवाद नै नरहेको जिकिर गरेको थियो । 

यो कुरामा महानगरपालिका सहमत नभएपछि सोमबारबाट सम्पूर्ण हिन्दी चलचित्रको प्रदर्शन काठमाडौँमा रोकिएको छ । ललितपुर महानगर पालिकाले आफूहरू चलचित्रको प्रदर्शन रोक्ने क्रममा नरहेको बताएको छ भने यो विषयमा अहिलेसम्म भक्तपुरको धारणा आइसकेको छैन । नेपालमा फिल्मको प्रदर्शन रोकिएपछि थुप्रै भारतीयले सामाजिक सञ्जालमा खुसी व्यक्त गरेका छन् । नेपालले चलचित्र रोकेर ठीक गरेको धेरैको प्रतिक्रिया छ ।