एउटै हिरोका दुई फिल्म एकै मितिमा, एकै दिन प्रचार सामाग्री

काठमाडौँ - यो खबर हो, अभिनेता मुकुन भुसालको । ‘बुलबुल’बाट अभिनयमा छिरेका मुकुन भुसालले अभिनय गरेका दुई फिल्म एकै मितिमा मात्र प्रदर्शन हुन लागेका छैनन्, प्रचार सामाग्री पनि एकै दिन आउँदैछन् ।

उनी अभीनित ‘एैँचो पैँचो’ र ‘गणपति’ले भदौ १४ लाई प्रदर्शन मिति घोषणा गरेका छन् । अब एउटा हिरोलाई एकै समयमा दुई दुई वटा फिल्मको प्रचार गर्न कति गाह्रो होला ? हामी कल्पना मात्र गर्न सक्छौँ । तर कलाकारको दुःखसँग निर्मातालाई के मतलब ? उनीहरूका आफ्नै तर्क हुन्छन् ।

---

सर्दै सर्दै भदौ १४ मा पुगेको ‘गणपति’ले शुक्रबार बेलुकी ५ बजेतिर गीत सार्वजनिक गर्दैछ । वर्षा सिवाकोटी नाचेको यो गीतमा मुकुनको पनि अभिनय छ । यता २ बजेतिर मुकुनकै मुख्य भूमिका रहेका ‘एैंचो पैँचो’ले टिजर सार्वजनिक गर्दैछ । यो फिल्ममा मुकुनसँगै स्वस्तिमा खड्का र वर्षा राउतको अभिनय रहेको छ ।

फिल्म राम्रो बनाउन प्रतिस्पर्धा गर्नु राम्रो कुरा हो । तर एकै दिन एउटै कलाकारका फिल्म लगाउनु कसैको पनि व्यवसायिक धर्म हैन । अझ एकै दिन प्रचार सामाग्री पनि सार्वजनिक गर्नु त अव्यवसायिकताको पराकाष्ठा नै हो । तर नेपाली निर्माता निर्देशकलाई यो बुझाइदिने कसले ?