‘हात्तीछाप’को छायांकन सुरु, दया र बेनिशा सेटमा

काठमाडौँ-  किरण नेपालीको निर्माण तथा सिमोस सुनुवारको निर्देशनमा तयार हुन लागेको फिल्म ‘हात्तीछाप’को आजबाट छायांकन सुरु भएको छ । बालकुमारीमा रहेको एक ग्यारेजबाट यो फिल्मको छायांकन सुरु भएको हो । छायांकन अगाडि फिल्मका कलाकारहरुले क्यामेरा पूजा गरेका थिए ।

सामाजिक कथावस्तुलाई कमेडी तरिकाले प्रस्तुत गरिने यो फिल्मलाई एक महिना खिचिने निर्माता नेपालीले जानकारी दिए । उनका अनुसार, यो फिल्मको छायांकन १५ दिन काठमाडौं र १५ दिन पोखरामा हुनेछ ।

---

फिल्म ‘हात्तीछाप’मा प्रदीप भारद्धाजको लेखन, सुशन प्रजापतिको छायांकन छ । फिल्ममा दयाहाङ राई, सौगात मल्ल, उपासना सिंह ठकुरी, बेनिशा हमाल, वुद्दि तामाङ, बिजय बराल, विल्सन विक्रम राई, कमलमणी नेपाल, राजन खतिवडा, पुस्कर गुरुङ, प्रकाश घिमिरे, विनोद न्यौपाने, कविता आले, रविन्द्र झा, रियर राई लगायतका कलाकारको अभिनय रहनेछ ।

नायिका बेनिशा हमालले पहिलो पटक दयाहाङ राईसँग काम गर्न पाउँदा आफू अत्यन्तै उत्साहित रहेको बताइन् । नायक दयाहाङ राईले फिल्मको कन्सेप्ट आफूलाई निकै मन परेकाले काम गर्न लागेको बताए ।

यसअघि किरण नेपालीको निर्माणमै बनेको फिल्म ‘२ नम्बरी’मा दया, सौगात र उपासनाले काम गरेका थिए । यो फिल्म हिट भएपछि किरणले ‘हात्तीछाप’को निर्माण सुरु गरेका हुन् ।