मेयरमाथि फिल्म बनाउने प्रतिस्पर्धा, राजु गिरीपछि दीपेन्द्र के खनाल पनि मेयरमाथि फिल्म बनाउँदै

काठमाडौँ - चल्तीको विषयले नेपाली चलचित्रकर्मीलाई आकर्षित गरिहाल्छ । नेपालमा अहिले गत वर्षयता निरन्तर नेपालका दुई मेयर चर्चामा छन्, बालेन शाह र हर्क साम्पाङ । दुवैको काम गर्ने शैलीमा आकाश जमिनको फरक छ तर समानता चाहिँ के छ भने दुवैले स्वतन्त्र मेयर हुन् । कुनै पार्टीको उम्मेदवार नभई जनताले पत्याएका ।

निर्वाचित भएपछि दुवै मेयर हरेक दिन राम्रो नराम्रो जेसुकै खबरले होस् निरन्तर चर्चामा छन् । चलचित्रकर्मी मेयरको यही क्रेज पर्दामा उतार्ने दौडमा सामिल भएका छन् ।

---

यसमा पहिलो भएका थिए निर्देशक राजु गिरी । उनले अघिल्लो हप्ता नै सामाजिक सञ्जालमा मेयरको जीवनशैलीलाई पर्दामा उतार्ने गरी ‘मेयरसाब’ शीर्षकको फिल्म बनाउन लागेको घोषणा गरे । उनले बनाउने मेयरसाब कुन मेयरबाट प्रभावित हो थाहा छैन तर उनले सुटिङ तयारी गर्न थालेको जनाएका छन् ।

यता यही विषयमा दीपेन्द्र खनालले पनि फिल्म बनाउने भएका छन् । उनले पनि असार १० गते ‘मेयर’ शीर्षकको टाइटल दर्ता गरेका छन् । ‘भष्मेडन’पछि उनले यही फिल्मको सुटिङ गर्ने गाइँगुइँ छ । उनले मेयरको शीर्ष भूमिका चाहिँ कसलाई गराउने भन्ने बुझिरहेको पनि चर्चा छ ।