‘कौसीद’माथि सेन्सर बोर्डको दादागिरी, दृश्य काट्न लगाएर प्रमाणपत्र

काठमाडौँ -  विदेशी फिल्मप्रति लचिलो हुने तर नेपाली फिल्मलाई सकेसम्म दुःख दिने आरोप लाग्दै आएको नेपालको सेन्सर बोर्डले यो परम्परा कायम राख्दै ‘कौसीद’को क्लाइमेक्स नै परिवर्तन गर्न बाध्य बनाएको छ । निर्माता केदार भुषालले फिल्मको क्लाइमेक्स परिवर्तन नगरे सेन्सर पास नै नगर्ने धम्कि दिएपछि आफूहरूले बाध्य भएर फिल्मको कथा नै परिवर्तन गर्नुपरेको बताए ।

‘बुधबार सेन्सरका लागि दिएका थियौँ । क्लाइमेक्स भएन । कि काट्नुस् कि रिसुट गर्नुस् भन्नु भयो । रिसुट गर्न सम्भव थिएन । त्यसैले उहाँहरुलाई चित्त बुझ्ने गरी काटेपछि उहाँहरुले बल्ल आज सेन्सर पास गरिदिनु भयो ,’केदारले भने, ‘भन्न खोजेको कथा नै भन्न पाइएन । तर कर्मचारीसँग झगडा गरिरहने तागत पनि हामीसँग भएन ।’

---

सेन्सर रोकिएपछि फिल्मका शुक्रबार बिहानी र दिउँसोका सो प्रभावित भएका छन् । फिल्म रिलिज नभएपछि हलले दर्शकको पैसा फिर्ता गर्नुपरेको थियो ।
केदारका अनुसार सेन्सर बोर्डले फिल्मको क्लाइमेक्सले भ्रष्टाचार गर्न प्रेरित गर्ने भन्दै दृश्य परिवर्तनका लागि बाध्य पारेको हो । चलचित्रले मध्यमवर्गीय परिवारको संघर्षको कथा प्रस्तुत गर्छ । चलचित्रको शीर्ष भूमिकामा भोला सापकोटा र ऋचा शर्मा रहेका छन् ।