एक महिना थपियो चलचित्र विकास बोर्डको ‘स्टोरी बैंक’मा कथा बुझाउने समय

काठमाडौँ-  चलचित्र विकास बोर्डले स्टोरी बैंकमा पटकथा बुझाउने म्याद १ महिना थपिएको जानकारी गराएको छ । बोर्डका अधिकृत गिरिश शर्माले थप पटकथाको सहभागिताका लागि समय थप गरिएको जानकारी गराए ।

‘अहिलेसम्म ४० हाराहारीमा पटकथा आएका छन् । तर, थप पटकथा सहभागी हुन् भनेर हामीले १ महिना समय थप्ने निर्णय गरेका हौँ,’ शर्माले भने । 
बोर्डले फिचर र सर्ट फिल्ममा पटकथाको माग गरी भदौ १२ गते सूचना प्रकाशित गरेको थियो । यसको मिति असोज ८ मा सकिएको हो । थुप्रै फिल्मकर्मीले काम गर्दा गर्दै समय अपुग भएको आग्रहका आधारमा समय थप्ने निर्णय गरिएको पनि उनले जानकारी गराए ।

---

बोर्डले गत साल स्टोरी बैंकको अवधारणा अगाडि सार्दै पटकथाका लागि आह्वान गरेको थियो । बोर्डले गत साल फिचर र सर्ट गरी ५ फिल्मलाई निर्माणमा सघाउने घोषणा गरी कार्यक्रम सञ्चालन गरेकोमा यो साल भने बोर्डले ५ फिचर र ५ सर्ट फिल्मलाई निर्माणमा सघाउने जानकारी गराएको छ । 

यसरी प्राप्त हुन आएका पटकथालाई बोर्डले निर्णायक समितिको सिफारिसका आधारमा निर्माणमा सघाउने बताएको छ । तर, बोर्डले गत सालको प्रतिस्पर्धामा सहभागी हुने कथाको हकमा भने अझै निर्णय गरेको छैन ।

राजनीतिक अस्थिरताका कारण बजेटमा अन्योल भएका कारण घोषणा गर्न नसकिएको बोर्ड अध्यक्ष दयाराम दाहालले जानकारी गराएका छन् । उनले औपचारिक कार्यक्रम गरेर नै विजेता फिल्म र फिल्मकर्मीको नाम घोषणा गर्ने जनाएका छन् ।