अन्तरिक्षमा १२ दिन सुटिङ गरेर फर्कियो रसियन फिल्म टोली

रसिया - रसियन निर्देशक र कलाकार १२ दिन अन्तरिक्षमा फिल्म सुटिङ गरेर पृथ्वीमा फर्किएका छन् ।  उनीहरू इन्टरनेसनल स्पेस स्टेसनमा १२ दिन बिताएर आइतबार पृथ्वीमा अवतरण भएका हुन् । उनीहरू आइतबार बिहान कजाकस्तानको एउटा विकट गाउँमा उत्रिएका हुन् । स्पेस सेन्टरबाट हिँडेको तीन घन्टामा उनीहरू पृथ्वीमा फर्किएको रसियन स्पेज एजेन्सी रस्कोमसले जनाएको छ । 

रसियाको सरकारी टेलिभिजनले उनीहरू झर्दै गरेको तस्बिर कैद गरेको थियो । अन्तरिक्षमा सुटिङ गरेर फर्किएकी अभिनेत्री युलिया पेरेसिल्डले अन्तरिक्ष छाड्नु पर्दा दुःख लागेको बताएकी छिन् । 

---

‘१२ दिनको समय एकदम लामो समय जस्तो लागेको थियो । तर सकिँदा मलाई त्यो ठाउँ छाड्न मन थिएन,’ ३७ वर्षीय अभिनेत्रीले रसियन टिभीसँगको कुराकानीमा भनेकी छिन् । 

‘च्यालेन्ज’ नामको यो फिल्म अन्तरिक्षमा सुटिङ गर्ने विश्वकै पहिलो फिल्म बनेको छ । यसअघि टम क्रुजले पनि अन्तरिक्षमा सुटिङ गर्ने घोषणा गरेका थिए । तर उनी सुटिङमा निस्कनुअघि नै रसियन क्रुले यो कीर्तिमानी काम गरेको हो ।