रजनीकान्तले गरे दादा साहेब फाल्के अवार्ड ड्राइवरमा समर्पण

तमिल - ६७ औँ राष्ट्रिय फिल्म पुरस्कारमा रजनीकान्तलाई यो साल दादा साहेब फाल्के अवार्डले सम्मानित गरियो । भारतीय फिल्मका सूत्रधार दादा साहेबको नाममा स्थापित यो सम्मान सरकारका तर्फबाट फिल्मकर्मीलाई दिने सर्वोच्च सम्मान हो । दुई दिनअघि राष्ट्रपति भवनमा आयोजित समारोहमा रजनीकान्तले यो सम्मान ग्रहण गरे तर उनले यो सम्मान राज बहादुरलाई समर्पण गरे । 

रजनीकान्तले सञ्चारकर्मीसँग कार्यक्रमपछि प्रतिक्रिया दिँदै आफूले पाएको सम्मान राज बहादुरमा समर्पण गरेको बताएका थिए । उनको यो प्रतिक्रियाले धेरैलाई अचम्भित बनायो । किनकी राज बहादुर रजनीकान्तका आफन्त होइनन् न त फिल्म उद्योगकै कुनै हस्ती । राज बहादुर रजनीकान्तका सबैभन्दा मिल्ने साथी हुन् तर पेसाले ड्राइभर ।

---

रजनीकान्तको बारेमा सबैले थाहा पाएको सबैभन्दा सत्य हो अभिनयमा लाग्नुअघि रजनीकान्त बस कन्डक्टर थिए । जतिबेला रजनीकान्त कन्डक्टर थिए त्यही बसका चालक थिए राज बहादुर र रजनीकान्तलाई फिल्ममा संघर्ष गर्न यिनै राजबहादुरले प्रेरित गरेका थिए । 

राज बहादुरका अनुसार सन् १९७० मा राज बहादुर कर्नाटका ट्रान्सपोर्ट कर्पाेरेसनमा ड्राइभर हुँदा त्यहीँ रजनीकान्त कन्डक्टर थिए । यही समयमा चाडपर्वमा हुने साँस्कृतिक कार्यक्रममा रजनीकान्तले स्टेजमा कलाकारिता प्रस्तुत गर्थे ।

उनमा विशेष प्रतिभा देखेपछि राज बहादुरले नै उसबेला शिवाजी राव गायकवाडको रुपमा चिनिने रजनीकान्तलाई चेन्नई गएर फिल्म इन्स्च्यिुटमा पढ्न जोड जबर्जस्ती गरेर पठाएका थिए । यति मात्र होइन उनले रजनीकान्तको पढ्ने खर्चसमेत बेहोरेका थिए । राज बहादुरले विभिन्न समयमा दिएको अन्तर्वार्तामा आफ्नो तलब ४ सय भएको बेलामा २ सय रुपैँया दिएर रजनीकान्तलाई अभिनय पढाएका थिए ।

दुई वर्ष यसरी इन्स्टिच्युटमा पढेपछि ग्रयाजुएसनको दिन तमिल फिल्मका हस्ती के बालाचन्दरले रजनीको अभिनयबाट प्रभावित भएपछि तमिल सिक्न अह्राएका थिए । यसको केही समयपछि नै उनले तमिल फिल्मबाट डेब्यु गरेका थिए । तर दक्षिण भारतीय फिल्मको सबैभन्दा ठूलो नाम हुँदा पनि रजनीकान्तले राज बहादुरको गुन बिर्सेका छैनन् । दादा साहेबको सम्मान उनैको नाम समर्पण गरेर रजनीकान्तले आफूलाई सम्मानित गरे ।