हिमाल आरोही निर्मल पूर्जाको फिल्म आउँदो महिना नेटफ्लिक्समा

काठमाडौँ - हिमाल आरोही निर्मल पूजाको आरोहणको विषयमा बनेको डकुमेन्ट्री नोभेम्बर २९ तारिखमा रिलिज हुने भएको छ । आरोही पूर्जाले शुक्रबार आफैँ फिल्मको पोस्टर सेयर गर्दै फिल्मबारे जानकारी गराएका हुन् । फिल्म विश्वका १ सय ९१ देशमा रिलिज हुने र ३१ भाषामा अनुवाद हुने निर्मल पूर्जाले जनाएका छन् । 

‘१४ पिक्स : नोथिंग इज इम्पोसिबल’ नाम रहेको डकुमेन्ट्रीमा ७ महिनाको अवधिमा उनले आरोहण गरेका हिमालको कथा समेटिएको छ । ७ महिनाको अवधिमा उनले ८ हजारभन्दा धेरै उचाइका १४ वटा हिमाल आरोहण गरेका थिए । उनले सात वर्ष लगाएर यति नै संख्यामा हिमाल आरोहण गरेका थिए । डकुमेन्ट्रीमा आफैँले बनाएको रेकर्ड भत्काएको कथा पनि समेटिएको छ । 

---

निर्मल पूर्जालाई पछ्याउँदै बनाइएको डकुमेन्ट्रीलाई टोरक्विल जोन्सले निर्देशन गरेका हुन् । ब्रिटिश आर्मीसमेत रहेका निर्मल पूर्जाका आरोहणसँग जोडिएका अनेक रेकर्ड छन् । उनले ४८ घन्टामा सगरमाथा, ल्होत्से र मकालुको आरोहण गरेर रेकर्ड राखेका थिए । पूर्जाका नाममा जाडो याममा पाकिस्तानको केटु हिमाल आरोहण गरेको रेकर्ड पनि छ । 

पूर्जाले आफ्नो यात्राले अरुलाई पनि प्रेरणा दिने अपेक्षा राखेका छन् । ‘यो एउटा असाधारण अनुभूति हो र यो हरकोही जित हो,’पूर्जाले भनेका छन्, ‘हिमाल चढ्ने हरकोहीको सपना हो र जोकोही यो सपना पूरा गर्न चाहान्छन् । म चाहान्छु १४ वटा हिमाल आरोहण गर्ने मेरो चुनौतीले पहाडलाई प्रेम गर्ने सबैलाई प्रेरित गरोस् । तर योभन्दा बढी म दुनियाँलाई देखाउन चाहान्छु, यदि तपाईँले केही गर्ने मन बनाउनु भएको छ भने तपाईँले त्यो लक्ष्य प्राप्त गर्नुहुन्छ । यसका लागि तपाईँ को हो र कहाँबाट आउनुभयो भन्ने कुराले केही फरक पर्दैन ।’

निर्मल पूर्जाले सन् २०१९ अप्रिल २३ मा अन्नपूर्ण हिमालको आरोहण गर्दै ७ महिने चुनौतीको सुरुवात गरेका थिए । सोही वर्षको मे २२ मा उनले सगरमाथाको आरोहण गरेका थिए । पूर्जाको यही आरोहणको विषयमा लेखिएको ‘बियोन्ड पोसिबल’ शीर्षकको फिल्म पनि प्रकाशित छ ।