वितरक र प्रदर्शकबीच सेयरको कुरा नमिलेपछि ‘सूर्यवंशी’को प्रदर्शन अन्यौलमा

मुम्बई - भोलि शुक्रबारबाट बलिउड फिल्म ‘सूर्यवंशी’ भारतमा रिलिज हुँदैछ । ‘सूर्यवंशी’ कोभिडको दुवै लहरपछि प्रदर्शनमा आउन लागेको सबैभन्दा ठूलो फिल्म मानिएको छ । त्यसैले भारतका केही राज्यमा ५० प्रतिशत अकुपेन्सीको नियम रहँदा रहँदै पनि फिल्मले १५ देखि २० करोडको ओपनिङ गर्ने अनुमान गरिएको छ ।

फिल्मको तीन चार दिन पहिले नै एडभान्स बुकिङ खुलेको छ र फिल्मको एडभान्स बुकिङ ४० प्रतिशत रहेको समाचार आइरहेका छन् । यसैले पनि फिल्मले राम्रो व्यापार गर्ने अनुमानलाई बल पुर्याइरहेको छ । तर भारतका तीन ठूला मल्टिप्लेक्सले भने एडभान्स बुकिङ खोलेका छैनन् ।

---

भारतका तीन ठूला मल्टिप्लेक्स चेन पिभिआर, इनोक्स र सिनेपोलिसले भने एडभान्स बुकिङ मात्र रोकेका छैनन्, यी मल्टिप्लेक्स चेनमा फिल्म लाग्ने नलाग्ने नै सस्पेन्स बनेको छ । वितरक रिलायन्स इन्टरटेनमेन्ट र यी मल्टिप्लेक्सबीच सेयरको कुरालाई लिएर विवाद नसुल्झिएपछि ‘सूर्यवंशी’को प्रदर्शन अन्यौलमा परेको हो ।

समाचारअनुसार वितरक रिलायन्सले पहिलो हप्ता मल्टिप्लेक्सबाट ६० प्रतिशत सेयर माग गरेको थियो । बाँकी वितरक राजी भए पनि माथि उल्लेखित तीन मल्टिप्लेक्स चेन भने रिलायन्सलाई ६० प्रतिशत दिन तयार भएनन् । उनीहरूले ५२ प्रतिशतभन्दा बढी सेयर दिन नसक्ने अडान राखेपछि भारतमा अहिले ती मल्टिप्लेक्समा फिल्मको एडभान्स बुकिङ खुलेको छैन । 

मल्टिप्लेक्सले ‘सूर्यवंशी’लाई ६० प्रतिशत दिन कुनै समस्या नभए पनि यो एउटा उदाहरणको रुपमा रहने र यो साल रिलिज हुने बाँकी फिल्मले पनि यति नै प्रतिशत माग्ने डर रहेको बताउँदै ‘सूर्यवंशी’को हकमा मात्र यो नियम लागू गर्न नसकिने बताउँदै आएका छन् ।

त्योबाहेक प्रदर्शनले आफूहरूले कमाउनलाई हलबाहेक विकल्प नभएको तर निर्मातासँगै ओटिटी र स्याटालाइट अधिकार बेच्ने विकल्प पनि रहेकाले आफूहरूलाई धेरै नचेप्न पनि उनीहरूले आग्रह गरेका छन् । 

रिलायन्स सम्बद्ध स्रोतलाई उद्धृत गर्दै बलिउड हंगामाले लेखेका समाचारअनुसार रिलायन्सले यो नियम डिसेम्बरमा प्रदर्शन हुन लागेको ‘८३’का लागि पनि लागू गर्न चाहेको छ । उसले हरेकचोटि प्रदर्शकसँग लड्न नसक्ने जनाउँदै एकैपल्ट यो कुरा सल्ट्याउन चाहेको छ । यसैबीच मल्टिप्लेक्स र ‘सूर्यवंशी’बीच भर्चुअल प्रिन्टिङ कस्ट (भीपीएफ) आधा आधा गर्ने सहमतिमा भने हस्ताक्षर भएको छ ।