‘फास्ट एन्ड फ्युरियस’ फ्रेन्चाइजमा फर्कन दि रकलाइ भिन डिजेलको आग्रह

लसएन्जल्स - भिन डिजेलले दि रक भनिने ड्वायन जोन्सनलाई ‘फास्ट एन्ड फ्युरियस’ शृंखलामा फर्कन आग्रह गरेका छन् । भिन डिजेलले रकलाई शृंखलाको अन्तिम भागमा सँगै काम गर्न आग्रह गरेका हुन् ।भिन डिजेलको यो आग्रह त्यतिबेला आएको छ जब दुवैबीच पानी बाराबार रहेका खबर आएका थिए । दुवैबीच झगडा परेको खबरले केही समय पहिले हलिउड नै हल्लिएको थियो । 

भिनको यो आग्रह इन्स्टाग्राममा आएको हो । उनले इन्स्टा पोस्टमा भनेका छन्, ‘रकले फिल्ममा महत्वपूर्ण भूमिका छ । उनले निर्वाह गर्दै आएको चरित्र हब अरु कसैले जिवन्त बनाउने कल्पना पनि गर्न सकिन्न । मलाई आशा छ उनले यो मौका छाड्ने छैनन् र भावीको इच्छा पनि पूरा गर्नेछन् ।’

---

दि रकले सन् २०११ मा बनेको ‘फास्ट एन्ड फ्युरियस’को पाँचौं भागबाट हबको रुपमा शृंखलामा प्रवेश गरेका थिए । तर ४९ वर्षीय रक यसको नवौँ भागमा देखिएका थिएनन् । उनले यो फिल्म रिलिज हुने संघारमा आफूले यो शृंखला छाडेको र भविष्यमा पनि यसमा अभिनय नगर्ने बताएका थिए । 

भिन डिजेलले ७ करोड इन्स्टा फ्लोअरलाई सम्बोधन गर्दै लेखेको पोस्टमा आफूले पाब्लोलाई सुखद अन्त्यको वाचा गरेको र अन्तिम शृंखला त्यो वाचा पूरा गर्ने हरसम्भव कोशिस गर्ने बताएका छन् । उनले कार दुर्घटनामा मारिएका पल वाकरलाई पाब्लो भनेर बोलाउने गरेका छन् । उनको सन् २०१३ मा मृत्यु भएको थियो । 

पल वाकर बितेपछि भिन डिजेलले वाकरको परिवारको अभिभावकको जिम्मेवारी निर्वाह गर्दै आइरहेका छन् । केही दिनअघि मात्र भिन डिजेलले पलकी छोरीको विवाह गराइ दिएका तस्बिर र खबर सार्वजनिक भएका थिए । उनले दि रकलाई भाइको रुपमा सम्बोधन गर्दै पललाई सम्झेर पनि फिल्मको हिस्सा हुन आग्रह गरेका छन् ।

सन् २०१७मा प्रदर्शन भएको ‘हब्स एन्ड स’ मा दि रकको दृश्य काटेपछि दुवैको झगडा सार्वजनिक भएको थियो । तर, यो फिल्मको सफलतापछि धेरथोर मथ्थर पनि भएको थियो । तर नवौँ शृंखलाको प्रचारप्रसारका क्रममा भिनले दि रकलाई अभिनय सिकाउने क्रममा गलफत्ती भएको अन्तर्वार्ता दिएपछि दुवैको झगडा झन् गहिरो भएको थियो ।

दि रकले डिजेलको यो कुराले आफूलाई हाँसो लागेको प्रतिक्रिया दिएका थिए । ‘फास्ट एन्ड फ्युरियस’को अन्तिम अर्थात दसौँ शृंखला सन् २०२३ को अप्रिलमा रिलिज हुने चर्चा छ । यता भिन डिजेलको पोस्टको प्रतिक्रियामा दि रकको भने जवाफ आइसकेको छैन ।